पुँजीगत बल र कानुनी संरचनाले कोषलाई सबल बनाउँदै, दीर्घकालीन सम्भावना र विस्तारका अवसर

काठमाडौं। नागरिक लगानी कोषले दीर्घकालीन वित्तीय सुरक्षा र सामाजिक लाभको दृष्टिले महत्वपूर्ण सम्भावना र अवसर प्रस्तुत गरेको छ। नेपाल सरकारको स्वामित्वमा रहेको र विशेष ऐनअनुसार स्थापना भएको स्वायत्त संस्था भएकाले सेवाग्राहीहरूमा कोषप्रति उच्च विश्वास  छ।  यस विश्वासले दीर्घकालीन संकलनमा स्थिरता ल्याउने र रकम वृद्धिमा सकारात्मक भूमिका खेल्ने  छ।

कोषद्वारा सञ्चालन गरिएका कार्यक्रम र सेवाहरूमा विविधता रहेकोले, संकलन रकम क्रमिक रूपमा वृद्धि हुँदै आएको छ। नागरिक लगानी कोष ऐन, २०४७ अनुसार, कोषले योगदानमा आधारित पेन्सन कार्यक्रम संचालन गर्न सक्ने अधिकार राख्छ। यसले दीर्घकालीन बचत सिर्जना गर्न र त्यस्तो बचतलाई दीर्घकालीन लगानीमा रूपान्तरण गर्न सक्ने अवसर प्रदान गर्दछ। विश्लेषकहरूले यसलाई कोषको वित्तीय स्थायित्व र दीर्घकालीन आर्थिक योजना सुनिश्चित गर्ने आधारका रूपमा मूल्यांकन गरेका छन्।

कोषको पुँजीगत आधार बलियो छ र यो मुलुकमा इन्भेस्टमेन्ट टस्ट्रीको रूपमा काम गर्ने एकमात्र संस्था भएकाले लगानी दिगोपना सुनिश्चित गर्न सक्षम छ। यस बलियो आधारले दीर्घकालीन वित्तीय योजना, जोखिम व्यवस्थापन, र सहभागीहरूलाई विश्वसनीय सेवा उपलब्ध गराउने क्षमतामा छ।

पूर्वाधार विकासका लागि सार्वजनिक–निजी साझेदारी (पीपीपी) मोडेल मार्फत लगानी गर्ने सम्भावना पनि उल्लेखनीय छ। यस मोडेलले दीर्घकालीन आर्थिक लाभ र सामाजिक सुरक्षा प्रणालीको वित्तीय मजबुती दुवै सुनिश्चित गर्ने अवसर प्रदान गर्दछ। विशेष गरी शिक्षा, स्वास्थ्य, ऊर्जा र यातायात क्षेत्रका पूर्वाधार परियोजनामा लगानी गरेर समाजमा प्रत्यक्ष लाभ पुर्‍याउन सकिनेछ।

सञ्चालित योजनाहरूको दायरा विस्तार गर्न सकिने सम्भावना पनि छ। यो विस्तारले आर्थिक गतिविधि मात्र नभई समाजमा समावेशीकरण र सामाजिक न्यायको लक्ष्य हासिल गर्न सहयोग पुर्‍याउनेछ। विश्लेषकहरूले औपचारिक क्षेत्र, स्वरोजगार र वैदेशिक रोजगारमा रहेका श्रमिक/कामदारलाई नागरिक पेन्सन योजनामा समेट्ने अवसरले सामाजिक सुरक्षा प्रणालीलाई सर्वसमावेशी बनाउने र दीर्घकालीन आर्थिक सुरक्षा सुनिश्चित गर्ने बलियो आधार तयार गर्ने बताएका छन्।

डिजिटल प्रविधिको प्रयोग मार्फत सहभागीहरूलाई गुणस्तरीय सेवा उपलब्ध गराउने अवसर पनि रहेको छ। अनलाइन प्रणाली, सूचना प्रविधि र मोबाइल प्लेटफर्मको प्रयोगले सेवाको पारदर्शिता, छिटो पहुँच, र प्रभावकारिता बढाउनेछ। यसले सहभागिहरूको विश्वास र लगानी गर्ने इच्छा दुवैमा वृद्धि गर्ने छ।

दीर्घकालीन बचत प्रवर्धन र लगानीमा रूपान्तरण,पुँजीगत बलमार्फत वित्तीय स्थायित्व सुनिश्चित,सार्वजनिक–निजी साझेदारी मार्फत पूर्वाधार विकास,स्वरोजगार र वैदेशिक रोजगारमा रहेका श्रमिकको समावेशीकरण,डिजिटल प्रणाली मार्फत गुणस्तरीय सेवा,जस्ता क्षेत्रहरूमा व्यापक सुधार र विस्तार गर्न सक्ने अवस्था रहेको छ। यी रणनीतिहरूले कोषलाई वित्तीय, सामाजिक र संस्थागत दृष्टिले अझ सबल, विश्वसनीय र दीर्घकालीन बनाउने अपेक्षा गरिएको छ।

नागरिक लगानी कोषले आफूलाई नाफामूलक र दीर्घकालीन रूपमा सबल बनाउने क्रममा विभिन्न चुनौतीहरूको सामना गर्दै आएको छ। विशेषज्ञहरूको विश्लेषण अनुसार, समान प्रकृतिका कार्य गर्ने अन्य संस्थाहरूको उपस्थितिले कोषको फण्ड संकलनमा प्रतिष्पर्धा बढाएको छ। यसले विद्यमान सहभागीहरू अन्य संस्थातर्फ जान सक्ने प्रवृत्तिलाई उत्पन्न गरिरहेको छ। यस सन्दर्भमा कोषले सहभागीहरूको विश्वास कायम राख्दै दीर्घकालीन लगानी सुनिश्चित गर्नु आवश्यक भएको छ।

कोषले लगानी विविधिकरण गर्दै जोखिम न्यून गर्ने र राम्रो मुनाफा सुनिश्चित गर्ने रणनीति अपनाउनु आवश्यक देखिएको छ। साथै, प्रवाह हुने सेवालाई डिजिटलाइजेशनमार्फत छिटो, पारदर्शी र पहुँच योग्य बनाउने आवश्यकता रहेको छ। विश्लेषकहरूले भनेका छन् कि डिजिटल प्रणाली लागू गर्दा सहभागीको सन्तुष्टि बढ्ने र कोषको सेवा विश्वसनीय हुने सम्भावना उच्च हुन्छ।

पुँजीबजारमा प्रतिस्पर्धात्मक रुपमा सेवा प्रवाह गर्न दक्षता र व्यावसायिकता अभिवृद्धि गर्न आवश्यक छ। यसका लागि दक्ष जनशक्तीको पदपूर्ति, स्थाई र संस्थामा उत्तराधिकार योजना तथा मानव संसाधन विकास प्रणालीलाई सुदृढ बनाउनु मुख्य प्राथमिकता बन्न पुगेको छ। यसले कोषको दीर्घकालीन स्थायित्व र लगानी क्षमतामा सकारात्मक प्रभाव पार्ने अपेक्षा गरिएको छ।

कानुनी र नीतिगत संरचनामा आवश्यक सुधारको अभावले पनि कोषको लगानी क्षमता सीमित भएको विश्लेषकहरूले देखाएका छन्। यस सन्दर्भमा, कोषसँग सम्बन्धित ऐन, नियम र नीति संशोधन गर्दै लगानी प्रक्रियालाई अझ स्पष्ट, प्रभावकारी र प्रतिस्पर्धात्मक बनाउन आवश्यक छ।

प्रविधिको क्षेत्रमा सुधार गर्दै, कोषमा प्रयोग हुने नागरिक लगानी कोष सफ्टवेयर लाई सबै कारोबार र अन्य निकायसँग समन्वय हुने गरी सहज बनाउनुपर्ने आवश्यकता छ। यसले कारोबार प्रक्रियामा दक्षता र पारदर्शिता सुनिश्चित गर्नेछ। साथै, सहभागीलाई दिइने प्रतिफल दर र शेयरधनीलाई दिने लाभांश उच्च बनाएर राख्नु कोषको दीर्घकालीन वित्तीय स्थायित्व र सहभागीको विश्वास कायम राख्ने उपायको रूपमा देखिन्छ।

विश्लेषकहरूले उल्लेख गरेका छन् कि नागरिक लगानी कोषले उपलब्ध सम्भावना र अवसरको अधिकतम उपयोग गर्दै, समस्याहरू समाधान गर्न आवश्यक रणनीति अपनाउनुपर्नेछ। यसमा मुख्यत: लगानी विविधिकरण, पूर्वाधार तथा उत्पादनशील क्षेत्रमा लगानी विस्तार, डिजिटल प्रणालीको सशक्तीकरण, दक्ष जनशक्तीको व्यवस्थापन र कानुनी सुधार समावेश छन्।

सञ्चालक समिति तथा व्यवस्थापनले यसै दिशामा काम गर्दै, कोषलाई नाफामूलक, प्रतिस्पर्धात्मक र सहभागीमैत्री संस्था बनाउने प्रयासलाई प्राथमिकता दिएको छ। विशेषज्ञहरूको भनाइअनुसार, यी रणनीतिहरू लागू भएमा कोष दीर्घकालीन रूपमा सबल र वित्तीय रूपले स्थायी हुने अपेक्षा  छ।

समग्रमा, नागरिक लगानी कोषले सामना गरिरहेका चुनौती र समस्याहरू समाधान गर्दै लगानी क्षमता र सेवा गुणस्तर वृद्धि गर्न सके, यसले  दीर्घकालीन वित्तीय स्थायित्व, सहभागी सन्तुष्टि र संस्थागत विश्वास सुनिश्चित गर्न सक्नेछ। यो प्रक्रिया सफलतापूर्वक अघि बढाउन कानुनी सुधार, डिजिटलाइजेशन, मानव संसाधन विकास र लगानी विविधिकरण अनिवार्य  छ।