नबिल बैंकको नाफा १.२८ प्रतिशत बढ्यो, निष्क्रिय कर्जा ४.९३ प्रतिशतमा

काठमाडौं। नबिल बैंकले चालु आर्थिक वर्षको पहिलो ६ महिनामा ३ अर्ब २४ करोड ४२ लाख रुपैयाँ नाफा कमाएको छ। यसले गत आर्थिक वर्षको सोही अवधिको तुलनामा १.२८ प्रतिशतको वृद्धि देखाएको हो। गत वर्षको सोही अवधिमा बैंकको नाफा ३ अर्ब २० करोड ३० लाख रुपैयाँ थियो।

यस अवधिमा बैंकको ब्याज आम्दानी ४.२१ प्रतिशतले घटेर ७ अर्ब ८९ करोड ५९ लाख रुपैयाँ पुगेको छ। यद्यपि, बैंकको खुद फि र कमिशन आम्दानीमा १.८२ प्रतिशतको वृद्धि भएको छ, जुन १ अर्ब ५१ करोड १४ लाख रुपैयाँ पुगेको छ।

नबिल बैंकको चुक्ता पूँजी २७ अर्ब ५ करोड रुपैयाँ रहेको छ भने यसको जगेडा कोषमा १ अर्ब ८९ करोड १७ लाख रुपैयाँ रहेको जानकारी प्राप्त भएको छ।

बैंकको प्रति सेयर आम्दानी २३ रुपैयाँ ७४ पैसाबाट बढेर २४ रुपैयाँ ५ पैसा पुगेको छ। नोक्सानी व्यवस्थाका लागि छुट्याइएको रकम १ अर्ब ३५ करोड रुपैयाँ रहेको छ, जुन गत वर्षको तुलनामा ६२ करोड रुपैयाँ कम हो।

नबिल बैंकको निष्क्रिय कर्जाको आकार कुल कर्जाको ४.९३ प्रतिशत रहेको छ। ६ महिनाको अन्त्यसम्म बैंकको वितरणयोग्य मुनाफा १ अर्ब ८९ करोड रुपैयाँ रहेको छ।