म्यानमार भूकम्प अपडेट : १,००२ जनाको मृत्यु , २,३७६ जना घाइते

एजेन्सी । म्यानमारमा गएको शक्तिशाली भूकम्पबाट मृत्यु हुनेको संख्या १,००२ पुगेको छ भने २,३७६ जना घाइते भएको देशको सत्तारुढ जुन्टाले शनिबार जनाएको छ। शुक्रबार मध्य म्यानमारको सागाइङ शहरको उत्तरपश्चिममा गएको ७।७ म्याग्निच्युडको भूकम्पले देशको ठूलो भागमा ठूलो क्षति पुर्‍याएको छ।

मध्य म्यानमारमा शुक्रबार गएको ७.७  म्याग्निच्युडको भूकम्पबाट मृत्यु हुनेको संख्या १०,००० नाघ्न सक्ने अनुमान संयुक्त राज्य भूगर्भ सर्वेक्षणजनाएको छ । देशको सैन्य सरकारले हालसम्म कम्तिमा १ ००२ जनाको मृत्यु भएको रिपोर्ट गरेको छ, तर थप भग्नावशेष हटाइँदै र शवहरू निकालिँदै जाँदा त्यो संख्या बढ्ने सम्भावना छ। भीषण विनाशका कारण म्यानमारका ६ राज्यहरू र थाइल्याण्डभरि आपतकाल घोषणा गरिएको छ।

रेडक्रसले बिजुली आपूर्ति अवरुद्ध भएकाले माण्डले, सागाइङ र दक्षिणी शान राज्यसम्म पुग्न प्रयासरत स्वयंसेवी टोलीलाई समस्या भइरहेको जनाएको छ ।