गिरीको निधनमा लहान नगरपालिकामा शोक बिदा

काठमाडौ , ५ भाद्र |नेपाली कांग्रेसका नेता एवं प्रतिनिधिसभा सदस्य प्रदीप गिरीको निधनमा शोकमा  आज आइतबार सिराहाको लहान नगरपालिकामा  बिदा दिइएको छ ।  गिरीको निधनमा नगर क्षेत्रभित्र शोक बिदा दिइएको लहान नगरपालिकाका नगर प्रमुख महेश चौधरीले बताए ।नगर प्रमुख चौधरीअनुसार नगरपालिकाका भित्रका क्याम्पसहरू, शैक्षिक प्रतिस्ठानहरू र उद्योग बाणिज्य संघ पनि बन्द रहने छन् ।

क्यान्सर रोगबाट पीडित नेता गिरीको स्वास्थ्योपचारको क्रममा शनिबार राति ९ः३० बजे ७५ वर्षको उमेरमा निधन भएको  थियो । उनको एक महीनादेखि नेपाल मेडिसिटी अस्पतालमा उपचार भइरहेको थियो।उनलाई निमोनिया देखिएको थियो। निमोनियासँगै क्यान्सरबाट उत्पन्न समस्याले च्यापेपछि उनका सबै अंगले काम गर्न छाडेको  थियो । गिरी विसं २०७४ को निर्वाचनमा सिरहा क्षेत्र नं १ बाट निर्वाचित भएका थिए ।