राष्ट्रिय झन्डाको मर्यादित प्रयोग गर्न गृह मन्त्रालयको आग्रह

काठमाडौं । गृह मन्त्रालयले राष्ट्रिय झन्डाको प्रयोग गर्दा कानुनको पालना गर्न र यसको सम्मान कायम राख्न सबैलाई आग्रह गरेको छ। निर्वाचनको समयमा झन्डाको दुरुपयोग बढ्न सक्ने भन्दै मन्त्रालयले विशेष ध्यान दिन भनेको हो।

मन्त्रालयका अनुसार निर्वाचन आचारसंहिता २०८२ ले चुनावी कार्यक्रमका बेला राष्ट्रिय झन्डाको प्रयोग सीमित गरेको छ। जुलुस, आमसभा, र्याली वा घरदैलो कार्यक्रममा दल वा उम्मेदवारले बढीमा १० वटा मात्र राष्ट्रिय झन्डा प्रयोग गर्न पाउने व्यवस्था छ। त्यसबाहेक प्रचारप्रसारमा राष्ट्रिय झन्डा प्रयोग गर्न पाइँदैन।

आइतबार जारी विज्ञप्तिमा मन्त्रालयले भनेको छ कि राष्ट्रिय झन्डा देशको गौरव र स्वाभिमानको प्रतीक भएकाले यसको प्रयोग मर्यादित र कानुनअनुसार हुनुपर्छ। झन्डाको अपमान वा दुरुपयोग भए कानुनअनुसार कारबाही गरिने चेतावनी पनि दिइएको छ।

राष्ट्रिय झन्डाको सही आकार, फहराउने तरिका र प्रयोगबारे ‘राष्ट्रिय झन्डा र राष्ट्रिय गीतको प्रयोगसम्बन्धी कार्यविधि, २०६९’ लागू छ। झन्डा उल्टो राख्ने, च्यात्ने, जलाउने, व्यापारिक विज्ञापनमा प्रयोग गर्ने वा शरीरको अनुचित भागमा झन्डाको चित्र राख्ने काम निषेध गरिएको छ।

प्रमुख जिल्ला अधिकारीलाई आफ्नो क्षेत्रमा झन्डाको सही प्रयोग भए–नभएको अनुगमन गर्ने जिम्मेवारी दिइएको मन्त्रालयले जनाएको छ।