काठमाडौं। स्वास्थ्य तथा जनसंख्या मन्त्रालयकी माननीय मन्त्री डा. सुधा गौतमले आज मंसिर १ गते वीर अस्पतालमा पुगेर अस्पतालका विभिन्न सेवा, विभाग र संरचनाको विस्तृत अनुगमन तथा निरीक्षण गरेकी छिन्। निरीक्षणका क्रममा उनले अस्पताल व्यवस्थापन, औषधि आपूर्ति, उपकरण मर्मत तथा सेवा विस्तार सम्बन्धी विभिन्न सुझाव र निर्देशनहरू प्रदान गरिन्।
मन्त्री गौतमले अस्पताल फार्मेसीमा औषधिको स्टक व्यवस्थित राख्न स्वास्थ्य सेवा विभागको व्यवस्थापन महाशाखासँग समन्वय गरी PAMS2 प्रणाली प्रयोग अनिवार्य गर्न निर्देशन दिइन्। उनले टेलीहेल्थ सेवा प्रभावकारी बनाउँदै विदेशमा रहेका नेपाली श्रमिकका लागि टेलिमेडिसिनमार्फत उपचार सेवा व्यवस्थित ढंगले सञ्चालन गर्न पनि जोड दिइन्।
बिरामीको अत्यधिक चापका बीच सेवा सहज बनाउन मन्त्रालयले राष्ट्रिय आयुर्वेद अनुसन्धान तथा तालिम केन्द्रमा रहेको सीटी–स्क्यान मेसिन तत्काल वीर अस्पतालमा स्थानान्तरण गर्ने तथा राष्ट्रिय आविष्कार केन्द्रसँग समन्वय गरेर बिग्रिएका मेडिकल उपकरणहरू छिटो मर्मत गर्ने निर्णयमा सहमति बनाएको छ।
यसबाहेक, मन्त्रीले बिमा फार्मेसीमा सूचीबद्ध सबै औषधि वीर अस्पतालको फार्मेसीमा उपलब्ध गराउन तथा गार्बेज व्यवस्थापन सुधार्न अस्पताललाई निर्देशन दिइन्।
सेवा विस्तारका विषयमा, अस्पतालमा ERCP सेवाका लागि लामो समयसम्म पालो कुर्नुपर्ने अवस्थालाई अन्त्य गर्न सेवाको संख्या र क्षमता दुवै बढाउने, साथै अतिरिक्त MRI मेसिन स्थापना गर्ने विषयमा विस्तृत छलफल भएको थियो।
काठमाडौं उपत्यकाका केन्द्रिय अस्पतालहरूमा बढ्दो चापलाई व्यवस्थित गर्न उपत्यकाबाहिरका संघीय तथा प्रादेशिक अस्पतालहरूलाई सुदृढ बनाउन आवश्यक समन्वय गर्ने विषयमा पनि मन्त्रालयले प्राथमिकता दिने जनाएको छ।
निरीक्षणका क्रममा मन्त्री गौतमले वीर अस्पतालमा उपचाररत जेन्जी दुर्घटनाका घाइतेहरूलाई भेटेर सरकारले उपचारमा सबै प्रकारको सहयोग गर्ने आश्वासन दिइन्।
मन्त्रीले क्यान्सर उपचारका लागि निर्माण गरिएको साइक्लोट्रोन बंकर, ज्येष्ठ नागरिक तथा बिमा काउन्टर, ICU, इमर्जेन्सी, ओपीडी र अन्य महत्वपूर्ण विभागहरूको पनि अवलोकन गरेकी छिन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
