रौतहटमा भएको घटनाप्रति माधवकुमार नेपालद्धारा चिन्ता व्यक्त

काठमाडौँ । पूर्वप्रधानमन्त्री र नेकपा सहसंयोजक माधवकुमार नेपालले रौतहटको गौरमा भएको पछिल्लो घटनाप्रति चिन्ता व्यक्त गरेका छन्। उनले गौर नगरपालिका–६ सवगढामा हिन्दू र मुस्लिम समुदायबीच उत्पन्न विवादको शान्तिपूर्ण समाधानका लागि संयमता अपनाउन आग्रह गरेका छन्।

नेपालले दुवै समुदायले आफ्नो धर्म, संस्कृति र चाडपर्वको सम्मान गर्दै सदियौँदेखि मिलेर बसेको स्मरण गराउँदै, साम्प्रदायिक हिंसा कुनै हालतमा स्वीकार्य नहुने बताए। उनी दुवै धर्मका मानिसहरू एकअर्काका पूरक भएको र स्थानीय जनताको सुरक्षा र जीवनको रक्षा गर्न सरकारले आवश्यक कदम चाल्नुपर्नेमा जोड दिएका छन्।

घटना पछि जिल्ला प्रशासन कार्यालय रौतहटले फागुन ९ गते दिउँसो १ बजेदेखि कर्फ्यु लागू गरेको थियो। धार्मिक तथा सामाजिक तनाव बढेपछि यो कर्फ्यु आइतबार बिहान ८ः३० बजेदेखि थप लम्ब्याइएको छ। विवाद बिहीबार राति सवगढामा विवाहको जन्ती मस्जिद अगाडि पुग्दा रोकिएर झगडा बढेपछि सुरु भएको थियो।