तीन करोडभन्दा बढीको जग्गा किनबेच गर्न अब इजाजतपत्र चाहिन्छ,अनलाइनमार्फत घरजग्गा कारोबारको इजाजतपत्र आवेदन सुरु

काठमाडौं । नेपाल सरकारको भूमि व्यवस्था, सहकारी तथा गरिबी निवारण मन्त्रालयअन्तर्गतको भूमि व्यवस्थापन तथा अभिलेख विभागले घरजग्गा कारोबारका लागि इजाजतपत्र लिने सम्बन्धी नयाँ प्रक्रिया लागू गरेको छ। विभागले सोमबार (मिति २०८२ कार्तिक १३ गते) सार्वजनिक सूचना जारी गर्दै महानगरपालिका र उपमहानगरपालिका क्षेत्रमा एक पटकमा तीन करोड रुपैयाँभन्दा बढी मूल्यको घरजग्गा कारोबार गर्नका लागि अब अनिवार्य रूपमा इजाजतपत्र लिनुपर्ने जनाएको छ।

विभागका अनुसार, मालपोत ऐन, २०३४ र मालपोत नियमावली, २०३६ (आठौं संशोधन २०८२) का प्रावधान बमोजिम यो व्यवस्था लागू गरिएको हो। इजाजतपत्रका लागि इच्छुक फर्म, कम्पनी वा संस्थाले आवश्यक कागजात स्क्यान गरी www.public.dolma.gov.np मार्फत ३० दिनभित्र अनलाइन आवेदन दिनुपर्नेछ।

नयाँ व्यवस्थाअनुसार, इजाजतपत्र प्राप्त गर्नका लागि कारोबार रकमका आधारमा शुल्क तोकिएको छ। पाँच करोड रुपैयाँसम्मको कारोबारका लागि पाँच लाख रुपैयाँ र पाँच करोड रुपैयाँभन्दा बढी रकमको कारोबारका लागि दश लाख रुपैयाँ दस्तुर बुझाउनुपर्नेछ।

विभागले यो प्रक्रिया घरजग्गा कारोबारमा पारदर्शिता, नियन्त्रण र आर्थिक अनुशासन कायम गर्नका लागि अघि बढाइएको जनाएको छ। साथै, आवेदकहरूले थप जानकारीका लागि विभागमा सम्पर्क गर्न सक्ने व्यवस्था गरिएको छ।