आजदेखि पूर्णरूपमा कान्तिलोकपथ सञ्चालनमा

ललितपुर,जेठ २१। कान्तिलोकपथमा आजदेखि यातायात सेवा पूर्णरुपमा सञ्चालनमा आएको छ । मर्मतसम्भारका लागि २०८० चैत १ गतेदेखि वैशाख २१ गतेसम्म उक्त रुटको सेवा अस्थायी रूपमा बन्द गरिएको थियो ।

कान्तिलोकपथ आयोजनाका सूचना अधिकारी तथा इन्जिनियर रवीन्द्र महर्जनले सडक मर्मत भई आजबाट यातायात सेवा सञ्चालनमा आएको जानकारी दिए । ललितपुरको वाग्मती गाउँपालिकाको वडा नं ३ देखि छपेलीसम्मको कार्किबासको साँघुरो खण्डमा र कल्चे क्षेत्रमा काट्ने काम सकिएको उनले बताए । तर, ललितपुरतर्फ एउटा मात्र लेन भएका कतिपय क्षेत्रमा अझै पनि कटिङको काम आवश्यक छ, यो वर्ष बजेट अभावका कारण ढिलाइ भएको छ । छपेलीदेखि कल्चेसम्मको खण्ड मात्रै बाँकी छ, बाँकी काम आगामी वर्षको लागि तोकिएको छ । कान्तिलोकपथ निर्माण सम्पन्न भएपछि सवारी साधनको आवागमनका लागि पूर्णरुपमा खुला हुनेछ,महर्जनले भने ।

वैशाख १५ गतेदेखि आंशिकरुपमा खुला गरिएको सडक मर्मतसम्भारका क्रममा कटिङ गर्दा माथिबाट खसेको ढुङ्गाले पूर्णरूपमा क्षति काल्चे खण्डको सडकको भाग भत्किएपछि वैशाख २१ गतेदेखि पूर्णरूपमा बन्द भएको थियो । काठमाडौँलाई हेटौँडासँग जोड्ने उपयुक्त र दूरीका हिसाबले छोटो मानिएको यो सडक निर्माण थालिएको ६७ वर्ष भइसकेको छ ।

विगतका सरकारले यो सडक निर्माणका लागि प्राथमिकता नदिँदा र विगतमा निर्माणको जिम्मा लिएका ठेकेदार कम्पनीले ढिलासुस्ती गरेर काम गर्दा यो सडक निर्माण ६७ वर्षदेखि निर्माणाधीन अवस्थामै छ । कान्तिराजमार्गको हेटौँडा बुद्धचोकदेखि ललितपुरको सातदोबाटोसम्म लम्बाइ ९२ किलोमिटर हो ।  यसमध्ये बुद्धचोकदेखि–टीकाभैरवसम्म ७९ किमि सडक आयोजनाले निर्माण गर्ने हो ।

बाँकी खण्ड निर्माणको जिम्मा सडक डिभिजन कार्यालय ललितपुरको हो । टीकाभैरवदेखि चापागाउँ बसपार्कसम्म डिभिजन कार्यालयले चौडा पार्ने काम पूरा गरेको भए पनि स्थानीयवासीको संरचनाको अवरोधका कारण ठेचो सुनाकोठीको भाग चौडा हुन नसकेपछि २०७६ सालमा सरकारले निर्णय गरेर सडकको खण्ड टीकाभैरवबाट छम्पी भैँसेपाटी हुँदै नख्खुसम्म तय गरेको छ । भैँसेपाटीसम्म सडक चौडा भएपछि छम्पी टीकाभैरव खण्डमा भने चौडा हुन बाँकी नै रहेको छ ।