कामना सेवा विकास बैंक र नेपाल युवा उद्यमी मञ्च-चितवनको सहकार्यमा बैंकिङ एण्ड बिजनेस कन्क्लेभ सम्पन्न

चितवन,  – कामना सेवा विकास बैंकले नेपाल युवा उद्यमी मञ्च-चितवनको सहकार्यमा बैंकिङ एण्ड बिजनेस कन्क्लेभ कार्यक्रम सम्पन्न गरेको छ। व्यवसायी र बैंकबीचको दूरी घटाउने उद्देश्यले आयोजित उक्त कार्यक्रममा चितवनका करिब ६० भन्दा बढी युवा व्यवसायीहरूको सहभागिता रहेको थियो।

कार्यक्रममा पत्रकार महासंघ चितवनका सचिव राजेश घिमिरेले मध्यस्थताको भूमिका निर्वाह गरेका थिए भने कामना सेवा विकास बैंकका नायब प्रमुख कार्यकारी अधिकृत विनय दाहाल, वित्तीय विज्ञ एफसिए विमन कार्की र नेपाल युवा उद्यमी मञ्च चितवनका पूर्व अध्यक्ष तथा व्यवसायी सूर्यभक्त अधिकारी वक्ताको रूपमा उपस्थित थिए।

वक्ताहरूले व्यवसाय र बैंकिङ क्षेत्रबीचको अन्तरसम्बन्ध, वित्तीय पारदर्शिता, नियमनकारी निकायहरूको नीति तथा नियमहरूको प्रभाव लगायतका विषयमा प्रकाश पारेका थिए। एफसिए विमन कार्कीले व्यवसायीहरूले प्रचलित कानुन र नियमहरूको पालना नगर्ने हो भने उनीहरू आर्थिक रूपमा दबाबमा पर्ने उल्लेख गर्दै व्यवसाय सञ्चालनका क्रममा पारदर्शिता अपनाउनु आवश्यक रहेकोमा जोड दिएका थिए।

नेपाल युवा उद्यमी मञ्च चितवनका पूर्व अध्यक्ष सूर्यभक्त अधिकारीले कोभिड-१९ को प्रभावबाट व्यवसायहरू उठ्न नपाउँदै विभिन्न नियमनकारी निकायहरूको कडाइका कारण थप समस्या उत्पन्न भएको औंल्याउँदै साना तथा मध्यम व्यवसायीहरूको संरक्षण आवश्यक रहेको बताएका थिए।

कामना सेवा विकास बैंकका नायब प्रमुख कार्यकारी अधिकृत विनय दाहालले पछिल्लो समय नियमनकारी संस्थाहरूले वित्तीय अनुशासन कडाइका साथ लागू गरेकाले व्यवसायीहरूले तत्काल कठिनाइ महसुस गरे तापनि दीर्घकालीन रूपमा यसले सकारात्मक प्रभाव पार्ने बताए।

पत्रकार महासंघ चितवनका अध्यक्ष वसन्तराज पराजुलीले कोभिड-१९ पछि होटल व्यवसायहरूमा परेको असरलाई ध्यानमा राख्दै बैंकहरूले विशेष प्राथमिकता दिनुपर्ने धारणा राखेका थिए। चितवन उद्योग वाणिज्य संघका उपाध्यक्ष राजेन्द्र वलीले नियमनकारी निकायहरूको कडाइ, कोभिड-१९ पश्चातको कर्जा विस्तार, पूर्वाधार निर्माणमा देखिएको ढिलाइ, युवा जनशक्तिको विदेश पलायनजस्ता कारणले उत्पादनमा गिरावट आउँदा व्यवसायहरू संकटमा परेको भन्दै नेपाल राष्ट्र बैंक तथा वित्तीय संस्थाहरूले यसतर्फ ध्यान दिनुपर्ने आवश्यकतामा जोड दिएका थिए।

कार्यक्रमका क्रममा युवा व्यवसायी अर्जुन रानाभाट, निरञ्जन न्यौपाने, पत्रकार दिपेन्द्र अधिकारीलगायतले विभिन्न जिज्ञासा राखेका थिए, जसका उत्तर वक्ताहरूले दिएका थिए।

नेपाल युवा उद्यमी मञ्च चितवनका प्रथम उपाध्यक्ष निशान पौडेलको अध्यक्षतामा सम्पन्न उक्त कार्यक्रममा द्वितीय उपाध्यक्ष सन्तोष कडेलले स्वागत मन्तव्य व्यक्त गरेका थिए भने कामना सेवा विकास बैंकका ब्रान्डिङ विभाग प्रमुख सुशील पौडेलले कार्यक्रमको उद्देश्यबारे प्रकाश पारेका थिए।

कार्यक्रमको समापन गर्दै नायब प्रमुख कार्यकारी अधिकृत दाहालले बैंक र व्यवसायीबीचको सहकार्यले बैंकिङ सेवा तथा उद्योग-व्यवसायको समृद्धिमा योगदान दिने भएकाले आगामी दिनहरूमा थप सहकार्य आवश्यक रहेको बताएका थिए।