कालिन्चोक हाइड्रोपावरको आईपीओ आजदेखि सर्वसाधारणका लागि खुल्ला

काठमाडौँ । कालिन्चोक हाइड्रोपावर लिमिटेडले आजदेखि सर्वसाधारणका लागि आफ्ना प्राथमिक सेयर (आईपीओ) बिक्रीमा ल्याएको छ। कम्पनीले पहिला आयोजनाबाट प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूलाई आईपीओ बाँडफाँट गरेको थियो। दोस्रो चरणमा सर्वसाधारणका लागि ६ लाख ८४ हजार ७५० कित्ता सेयर प्रतिसेयर १०० रुपैयाँमा निष्कासन गरिएको छ।

कम्पनीको कुल जारी पूँजी ५५ करोड रुपैयाँ रहेको छ र यसमा २५ प्रतिशत अर्थात १३ करोड ७५ लाख रुपैयाँ बराबरका सेयर IPO मार्फत बिक्रीमा ल्याइएको हो। यसमध्ये स्थानीय बासिन्दाका लागि ५ लाख ५० हजार, विदेशमा रहेका नेपालीका लागि ८२ हजार ५००, सामूहिक लगानी कोषका लागि ४१ हजार २५० र कर्मचारीका लागि १६ हजार ५०० कित्ता सुरक्षित राखिएको छ।

आईपीओमा न्यूनतम १० कित्ता र अधिकतम १० हजार कित्तासम्म आवेदन दिन सकिनेछ। आवेदन चैत २५ गतेसम्म दिन सकिनेछ र आवश्यक परे अवधि वैशाख ६ गतेसम्म बढाइनेछ। कम्पनीले दोलखा जिल्लामा ५ मेगावाट क्षमताको जलविद्युत आयोजना निर्माण गरेको छ।