विद्युत् प्राधिकरणका नवनियुक्त निर्देशक शाक्यलाई इप्पानको बधाई, जलविद्युत् आयोजनाको ढिलाइबारे सुझाव

काठमाडौं । स्वतन्त्र ऊर्जा उत्पादकहरुको संस्था नेपाल (इप्पान)ले नेपाल विद्युत् प्राधिकरणका नवनियुक्त कार्यकारी निर्देशक हितेन्द्रदेव शाक्यलाई बधाई तथा शुभकामना व्यक्त गरेको छ। सोही अवसरमा इप्पानले जलविद्युत् आयोजनाको ढिलाइ रोक्न तथा व्यावसायिक विद्युत् उत्पादन सहज बनाउन आरसीओडी (व्यावसायिक सञ्चालन मिति) थप गर्नुपर्ने माग समेत राखेको छ।

इप्पानका अध्यक्ष गणेश कार्कीले आयोजनाहरू वन मन्त्रालयबाट रुख कटान तथा भारतबाट विस्फोटक पदार्थ आयातको अनुमति नपाउँदा तोकिएको समयमा सम्पन्न हुन नसकेको उल्लेख गर्दै, यस्तो परिस्थितिमा आरसीओडी सहज रूपमा थप गर्नुपर्ने बताएका छन्। उनले विद्युत् खरिद बिक्री सम्झौता (पीपीए)मै यस्तो व्यवस्थालाई स्पष्ट रूपमा समावेश गर्नुपर्ने आवश्यकता रहेको बताए।

इप्पानका वरिष्ठ उपाध्यक्ष मोहन कुमार डाँगीले निजी क्षेत्र सरकारको २८,५०० मेगावाट विद्युत् उत्पादन गर्ने लक्ष्यमा सहकार्य गर्न तयार रहेको बताए। पूर्व अध्यक्ष शैलेन्द्र गुरागाईंले वन मन्त्रालयबाट अनुमति पाउन ढिलाइ हुनुका साथै विस्फोटक पदार्थ अभाव तथा ठूला आयोजनाको वित्तीय व्यवस्थापन चुनौतीपूर्ण बन्दै गएको बताए। उनले यस्ता परिस्थितिहरूलाई मध्यनजर गर्दै आरसीओडी थप गर्ने व्यवस्था मिलाउन आग्रह गरे।

इप्पानका उपाध्यक्ष उत्तम भ्लोनले प्रसारण लाइन निर्माणमा भएको ढिलाइका कारण दोर्दी करिडोरका निजी क्षेत्रका आयोजनाहरूले आफ्नै प्रसारण लाइन बनाउन बाध्य भएको जानकारी दिए। इप्पानका उपमहासचिव प्रकाश दुलालले वन तथा भारत सरकारका कारण निर्माणमा ढिलाइ भएका आयोजनाहरूको आरसीओडी स्वतः लम्ब्याउने व्यवस्था हुनुपर्ने बताए।

नवनियुक्त कार्यकारी निर्देशक हितेन्द्रदेव शाक्यले वर्षायामका ६ महिनासम्म आरसीओडीभन्दा ढिलो विद्युत् उत्पादन भए पनि पेनाल्टी नलाग्ने व्यवस्था मिलाउन पहल गरिने प्रतिबद्धता जनाए। उनले इप्पानको दुई वर्ष आरसीओडी थप्ने माग नेपाल सरकारको निर्णयमा निर्भर रहने जनाउँदै, विशेष समस्या झेलिरहेका आयोजनाहरूलाई मध्यनजर गरी समयावधि लम्ब्याउने विषयमा सकारात्मक रहने बताए।

शाक्यले निजी क्षेत्रलाई जलाशययुक्त वा अर्धजलाशययुक्त आयोजना निर्माणमा केन्द्रित हुन आग्रह गरे। उनले पिकिङ क्षमताका आयोजनाको विद्युत् खरिद सम्झौता (पीपीए) दर परिमार्जन गर्न छलफल गर्न सकिने बताए।

इप्पानले जलवायु परिवर्तनका कारण हाइड्रोलोजी पेनाल्टी हटाउन माग गरेकोमा शाक्यले ग्रिड अनुशासन पालना हुने गरी पेनाल्टी पुनर्मूल्यांकन गर्न सकिने बताएका छन्।

बधाई तथा छलफल कार्यक्रममा इप्पान अध्यक्ष गणेश कार्की, पूर्व अध्यक्ष शैलेन्द्र गुरागाईं, वरिष्ठ उपाध्यक्ष मोहन कुमार डाँगी, उपाध्यक्ष उत्तम भ्लोन, उपमहासचिव प्रकाश दुलाल, सचिव हिम प्रसाद पाठक, तथा कार्यसमिति सदस्यहरू सहभागी थिए।