हिमालयन बैंकको एफपिओ बाँडफाँट

काठमाडौँ — हिमालयन बैंकले जारी गरेको एफपिओ (फोलो–अन पब्लिक अफर) मंगलबार बिहान बाँडफाँट गरिएको छ। कमलादीस्थित बैंकको कार्यालयमा लटरी प्रणालीमार्फत बाँडफाँट गरिएको हो।

एफपिओमा कुल १८ लाख २५ हजार ९२२ जनाले ३ करोड ८५ लाखभन्दा धेरै कित्ता सेयरका लागि आवेदन दिएका थिए। तीमध्ये १७ लाख ४ हजार २७३ जनाको आवेदन स्वीकार भएको छ भने बाँकी आवेदनहरू रद्द गरिएको छ।

बाँडफाँटका क्रममा ९ लाख २५ हजार ४६ जनाले १० कित्ताका दरले सेयर पाएका छन्। बाँकी रहेको ९ कित्ता सेयर भने २० कित्ताका लागि आवेदन दिनेहरूमध्ये ९ जनालाई थप १ कित्ताका दरले बाँडिएको छ। बैंकले आम लगानीकर्ताका लागि सेयर हिस्सा ३० प्रतिशत पुर्‍याउन १५७ रुपैयाँ प्रतिकित्ताको दरमा ९२ लाख ५० हजार ४६९ कित्ता सेयर एफपिओमार्फत बिक्री गरेको हो।

हाल बैंकको कुल चुक्ता पूँजी २१ अर्ब ६५ करोड रुपैयाँभन्दा बढी छ, जसको ७२.९९ प्रतिशत हिस्सा संस्थापक समूहसँग र २७.०१ प्रतिशत सर्वसाधारणसँग रहेको छ। एफपिओको नतिजा हेर्न इच्छुक लगानीकर्ताले सिटिजन्स क्यापिटलको वेबसाइट वा मेरो सेयर एकाउन्टबाट जानकारी लिन सक्नेछन्।