सगरमाथा संवादपछि पहिलो पटक उच्चस्तरीय ईयू प्रतिनिधिमण्डलको नेपाल भ्रमण

काठमाडौं – प्रधानमन्त्री केपी शर्मा ओलीसँग युरोपियन युनियन (EU) को प्रतिनिधिमण्डलले सोमबार प्रधानमन्त्री निवास बालुवाटारमा शिष्टाचार भेटवार्ता गरेको छ। भेटमा नेपालका लागि युरोपियन युनियनकी राजदूत भेरोनिक लोरेन्जोसहित युरोपेली मुलुकहरूका काठमाडौंस्थित राजदूतहरू र भारतको नयाँ दिल्लीस्थित गैह्रआवासीय प्रतिनिधिहरूको सहभागिता थियो।

यही जेठ २ देखि ४ गतेसम्म काठमाडौंमा सम्पन्न “सगरमाथा संवाद” कार्यक्रममा सहभागी हुन युरोपेली युनियनका यति धेरै राजदूतहरू पहिलोपटक एकै पटक नेपाल आएका हुन्। उक्त अवसरलाई उपयोग गर्दै भएको भेटमा नेपाल–ईयूबीच ५१ वर्षदेखि कायम रहेको कूटनीतिक सम्बन्ध, आपसी सहयोग, आर्थिक विकास र स्थायित्वका विषयमा विस्तृत छलफल भएको थियो।

भेटका क्रममा प्रधानमन्त्री ओलीले नेपालले सशस्त्र द्वन्द्व, जनआन्दोलन र शान्ति प्रक्रियाको कठिन चरण पार गर्दै नयाँ संविधान जारी गरेको र त्यसपछि देशले स्थायित्व, आर्थिक विकास र सुशासनतर्फ प्रगति गरिरहेको जानकारी गराए। उनले नेकपा (एमाले) र नेपाली काँग्रेसजस्ता मुख्य राजनीतिक दलहरूबीचको सहकार्यका आधारमा गठन भएको वर्तमान सरकार आर्थिक समृद्धि र रोजगारी सृजनामा केन्द्रित रहेको उल्लेख गर्दै विदेशी लगानीको अवसर उपलब्ध गराउन सरकार प्रतिबद्ध रहेको बताए।

प्रधानमन्त्री ओलीले जनताको संघर्षबाट प्राप्त संघीय लोकतान्त्रिक गणतन्त्रात्मक प्रणालीबाट अब कुनै पनि हालतमा पछि नफर्किने स्पष्ट पार्दै देशको आगामी लक्ष्य समृद्धि र स्थायित्व रहेको धारणा व्यक्त गरे। साथै, “सबैसँग मित्रता, कसैसँग शत्रुता होइन” भन्ने नेपालको परराष्ट्र नीतिको व्याख्या गर्दै भारत र चीनसँग सन्तुलित तथा मैत्रीपूर्ण सम्बन्ध कायम रहेको र अन्य राष्ट्रहरूसँग समेत मित्रवत सम्बन्ध विस्तार भइरहेको जानकारी दिए।

संक्रमणकालीन न्यायसम्बन्धी कानुन निर्माण भई दुई आयोग गठन भइसकेको सन्दर्भमा प्रधानमन्त्री ओलीले सम्बन्धित पक्षहरूसँगको परामर्शका आधारमा न्याय सम्पादन प्रक्रिया अब ढिलो नहुने विश्वास व्यक्त गरे।

भेटका क्रममा युरोपियन युनियनका राजदूतहरूले नेपालमा शिक्षा, पूर्वाधार, स्वास्थ्य, हरित ऊर्जा, सूचना प्रविधि र जलवायु परिवर्तनजस्ता क्षेत्रमा यथावत् सहयोग जारी राख्ने प्रतिबद्धता व्यक्त गरेका थिए। उनीहरूले संक्रमणकालीन न्यायलाई पीडित–केन्द्रित बनाउन आग्रह गर्दै नेपालको प्रगतिको यात्रामा निरन्तर सहकार्य हुने आश्वासन पनि दिए।

प्रधानमन्त्रीसँगको भेटमा उनका प्रमुख सल्लाहकार विष्णु प्रसाद रिमाल, परराष्ट्र मन्त्रालयका उच्च अधिकारीहरू लगायतको उपस्थिति रहेको थियो।