राजदूत फिर्ता बोलाउने सरकारको निर्णयविरुद्ध आज सुनुवाइ हुँदै

काठमाडौँ — सरकारको राजदूत फिर्ता बोलाउने निर्णयविरुद्ध दायर रिटको सुनुवाइ आज पनि सर्वोच्च अदालतमा हुँदैछ। गत शुक्रबार सुनुवाइ नसकिँदा हेर्दाहेर्दैमा राखिएको यो रिटको आज न्यायाधीश सारङ्गा सुवेदी र श्रीकान्त पौडेलको संयुक्त इजलासमा पेशी चढेको छ।

असोज ३० गते बसेको मन्त्रिपरिषद बैठकले निर्वतमान प्रधानमन्त्री केपी शर्मा ओली नेतृत्वको सरकारले नियुक्त गरेका ११ देशका राजदूत फिर्ता बोलाउने निर्णय गरेको थियो। यसपछि अधिवक्ता प्रतिभा उप्रेती र अनन्तराज लुईंटेलले रिट दायर गरी उक्त निर्णय बदर गर्ने माग राखेका हुन्।

रिटमा अन्तरिम आदेशको समेत माग गरिएको छ। निवेदकहरूले दाबी गरेका छन् कि कामचलाउ सरकारले दूरगामी राष्ट्रिय विषयमा निर्णय गर्ने अधिकार छैन र अघिल्लो सरकारले नियुक्त गरेका राजदूतहरू फिर्ता बोलाउनु नयाँ राजनीतिक परिस्थितिमा संविधान र राजनीतिक म्याण्डेटविपरीत भएको छ।