अछाममा छाउगोठ बसेकी एक किशोरी बलात्कृत, एक जना पक्राउ

काठमाडौँ ५ असार | अछाममा छाउगोठमा बसेकी एक किशोरी बलात्कृत भएकी छिन् । मंगलबार बेहोस् अवस्थामा भेटिएकी १६ वर्षीया किशोरीमाथि बलात्कार भएको खुलेको प्रहरीले जनाएको छ ।

किशोरी बलात्कारको आरोपमा प्रहरीले स्थानीय १७ वर्षीय किशोरलाई पक्राउ गरेको छ ।पञ्चदेवल विनायक नगरपालिकामा मामाघरमा बस्दै आएकी १६ वर्षीया किशोरी मामाघरको नजिक रहेको छाउगोठमा उनी बलात्कृत भएकी हन् ।उनी ११ वर्षदेखि मामाघरमै बस्दै आएकी थिइन ।

अस्पतालमा उपचार पश्चात् होसमा आएकी ती किशोरीले आफू माथि बलात्कार भएको र उनले स्थानीय १७ वर्षीय किशोर लगायत ३÷४ जनाले बलात्कार गरेको बताएकी छिन् । आँखा र घाँटीमा कपडाले बाँधेकोले अन्य व्यक्तिलाई आफूले चिन्न नसकेको पीडित किशोरीको बताएकी छिन् । पक्राउ परेका किशोर नातेदार रहेको र उनीहरू एउटै विद्यालयमा अध्ययन गर्छन् ।