काठमाडौं । जेनजी आन्दोलनका क्रममा गत भदौ २३ र २४ गते आगजनी र तोडफोडबाट क्षति पुगेका भौतिक संरचनाको पुनर्निर्माणका लागि सरकारले स्थापना गरेको भौतिक पूर्वाधार पुनर्निर्माण कोष मा हालसम्म ६ करोड १० लाख रुपैयाँ संकलन भएको छ।
अर्थ मन्त्रालयका प्रवक्ता टङ्कप्रसाद पाण्डेका अनुसार आइतबार बिहानसम्म कोषमा उक्त रकम जम्मा भइसकेको छ। आन्दोलनका क्रममा क्षति भएका संरचनाको पुनर्निर्माणमा सहयोग पु-याउने उद्देश्यले सरकारले कोष स्थापना गरी नागरिक, निजी क्षेत्र, गैरआवासीय नेपाली, विकास साझेदार, संघ–संस्था तथा दातृ निकायलाई योगदानको लागि आह्वान गरेको हो।
सरकारले कोषमा गरिने आर्थिक सहायता रकम करयोग्य आय गणनामा छुट दिने व्यवस्था गरेको छ। यसअन्तर्गत योगदानकर्ताले चालु आर्थिक वर्षको करयोग्य आयमा कट्टी गर्न पाउने सुविधा हुनेछ।
पुनर्निर्माण कोषका लागि राष्ट्रिय वाणिज्य बैंक सिंहदरबार शाखामा खाता नम्बर १९६०१००१०२०७०००४ खोलिएको छ। इच्छुकले सो खातामा सहयोग रकम जम्मा गर्न सक्ने व्यवस्था गरिएको छ।
अर्थ मन्त्रालयका अनुसार योगदानकर्ताको विवरण शीघ्र सार्वजनिक गर्ने तयारी भइरहेको छ। यस कदमले क्षति भएका संरचनाको पुनर्निर्माणमा पारदर्शिता र प्रभावकारीता ल्याउने विश्वास गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
