सामाजिक सञ्जाल प्रतिबन्धविरुद्ध जेनजी पुस्ताको माइतीघरमा प्रदर्शन

काठमाडौँ — जेनजी पुस्ता (सन् १९९७ देखि २०१२ बीचमा जन्मिएका युवा) ले सामाजिक सञ्जाल प्रतिबन्ध र व्यापक भ्रष्टाचारविरुद्ध काठमाडौंमा प्रदर्शन गर्ने भएका छन्। आगामी भदौ २३ गते बिहान ११ बजे काठमाडौंको माइतीघर मण्डलमा हुने उक्त प्रदर्शनमा युवाहरूको उल्लेखनीय सहभागिता रहने अनुमान गरिएको छ।

आन्दोलनका आयोजकहरूले विद्यार्थीलाई पोशाक लगाएर, परिचयपत्रसहित र कम्तीमा एउटा किताब बोकेर माइतीघर मण्डलमा उपस्थित हुन आह्वान गरेका छन्। उनीहरूले यसलाई ‘शिक्षा र चेतनाको प्रदर्शन’ भन्दै सामाजिक सञ्जालमा अभियान सुरु गरेका छन्। विशेषगरी टिकटकमा यो विषयले ठूलो टेण्ड सिर्जना गरेको छ।

नेपाल सरकारले दर्ता नभएका सामाजिक सञ्जाल जस्तै फेसबुक, युट्युब, इन्स्टाग्राम र टिकटकलाई बन्द गर्ने निर्णय गरेको छ। सो निर्णयले युवापुस्तामा असन्तोष बढाएको छ। जेनजी पुस्ताले यो निर्णय नागरिक अधिकार हनन् भएको भन्दै विरोध जनाएका हुन्।

युवाहरूले यस प्रदर्शनमा ललिता निवास जग्गा प्रकरण, ठूला भ्रष्टाचार, वंशवाद, असमान सम्झौता, बेरोजगारी र सुशासनको अभावजस्ता मुद्दा प्रमुख एजेन्डा बनाउने बताएका छन्। उनीहरूले देशमा पारदर्शी शासन, रोजगारी सिर्जना र नागरिक अधिकारको सम्मान हुनुपर्ने माग राखेका छन्।

आन्दोलनका प्रतिनिधिहरूले प्रधानमन्त्री हुँदै उच्च पद धारण गरेका व्यक्तिहरू अझै कानुनी दायरामा नआएको उदाहरण दिएका छन्। भ्रष्टाचारविरुद्ध ठोस कारबाही नभएसम्म युवा आन्दोलन जारी रहने उनीहरूको भनाइ छ।

सामाजिक सञ्जालको प्रयोग नै प्रतिबन्धको विरोधमा प्रमुख हतियार बनेको छ। फेसबुक र युट्युबमा आंशिक पहुँच अवरुद्ध भए पनि टिकटकमा ह्यासट्याग आन्दोलन मार्फत युवाहरूले आफ्नो आवाज बुलन्द गरिरहेका छन्।

विश्लेषकहरूका अनुसार, जेनजी पुस्ताको यो प्रदर्शन नेपाली राजनीतिमा युवापुस्ताको सक्रियता र असन्तोषको प्रत्यक्ष अभिव्यक्ति हो। उनीहरूले उठाएका मुद्दा तत्कालीन सरकारका लागि चुनौतीपूर्ण बन्ने देखिन्छ।