काठमाण्डौ । नेपालमा हरेक वर्ष करिब ५० बालबालिकामा आँखाको क्यान्सर, रेटिनोब्लास्टोमा, देखा पर्ने गर्दछ। यस रोगको उपचार धेरै परिवारको पहुँचभन्दा बाहिर रहेको अवस्थामा, अष्ट्रेलियन क्याथोलिक विश्वविद्यालय (ACU) ले पछिल्लो १८ महिनादेखि नेपालका बालबालिकाको उपचारका लागि आर्थिक सहयोग प्रदान गर्दै आएको छ।
ACU को सहयोगले काठमाडौंस्थित तिलगंगा आँखा संस्थानमा ओपन आइज नेपाल मार्फत बालबालिकाको निःशुल्क उपचार सम्भव भएको छ। रेटिनोब्लास्टोमा बालबालिकामा हुने सबैभन्दा सामान्य आँखाको क्यान्सर हो, जुन समयमै उपचार नगरिएमा ज्यानै खतरामा पर्न सक्छ।
*निःशुल्क उपचार र सामाजिक पुनःस्थापना*
ओपन आइज नेपालका अध्यक्ष डा. पूर्णिमा राजकर्णिकारका अनुसार, “रेटिनोब्लास्टोमाले परिवारको आर्थिक र सामाजिक जीवनमा ठूलो प्रभाव पार्छ, किनभने यसको उपचार लामो र महँगो हुन्छ। ACU को सहयोगले उपचार खर्च कम गर्न र कृत्रिम आँखा उपलब्ध गराउन ठूलो सहयोग मिलेको छ।”
पछिल्लो १८ महिनाको अवधिमा ACU र ओपन आइज नेपालको सहकार्यबाट करिब ४० जना बालबालिकाले निःशुल्क उपचार पाएका छन्। तीमध्ये २८ जनालाई विशेष गरी निर्मित कृत्रिम आँखा उपलब्ध गराइएको छ।
*उदाहरणीय उपचार कथा*
ती बालबालिकामध्ये तीन वर्षकी जनुका एक हुन्। दुबै आँखामा रेटिनोब्लास्टोमा रहेको जनुकाको आमा एकल महिला हुन्, जो कार्पेट उद्योगमा काम गर्थिन्। उनको आमाको आर्थिक अवस्थाले उपचार सम्भव थिएन। ओपन आइज नेपालले ACU को आर्थिक सहयोगमा जनुकाको उपचारको व्यवस्था गर्यो। उनको दाहिने आँखा निकालेर कृत्रिम आँखाको प्रत्यारोपण गरियो भने बाँया आँखा बचाउन कीमोथेरापी, ट्रान्सप्युपिलरी थर्मोथेरापी र क्रायोथेरापी जस्ता उपचार विधि अपनाइएको थियो।
*ACU को प्रतिबद्धता*
ACU का प्रा-उपकुलपति ग्लोबल एन्ड एजुकेसन पाथवेज क्रिस राइलीले जनुकाको उपचारले विश्वविद्यालयको मानवीय मूल्यमाथि जोड दिएको बताए। “हाम्रो सहकार्यले बालबालिकाको जीवन परिवर्तन भएको सुन्नु ACU को लागि गर्वको विषय हो। हामी यसलाई समाजको हित र गरिमाको उन्नतिको अवसरका रूपमा लिन्छौं।” ACU र ओपन आइज नेपालको यो चारवर्षे साझेदारीले बालबालिकाको जीवनमा ठूलो परिवर्तन ल्याउने अपेक्षा गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
