पाकिस्तानका पूर्व प्रधानमन्त्री इमरान खान र पत्नीलाई १७–१७ वर्ष जेल सजाय

एजेन्सी ।  पाकिस्तानका पूर्व प्रधानमन्त्री इमरान खान र उनकी पत्नी बुशरा बीबीलाई पाकिस्तानी अदालतले राज्यबाट पाएका महँगो उपहार गलत तरिकाले राखेको र बेचिएको ठहर गर्दै १७ वर्ष जेल सजाय सुनाएको छ। शनिबार आएको यो फैसलाले लामो समयदेखि चल्दै आएको मुद्दाको टुंगो लगाएको हो। इमरान खान दम्पतीमाथि साउदी अरेबिया सरकारबाट प्राप्त गहना लगायतका उपहारहरू वास्तविक मूल्यभन्दा धेरै कम मूल्य देखाएर बेचेको आरोप लागेको थियो। उनीहरूले भने सबै आरोप अस्वीकार गरेका छन्।

पाकिस्तानको कानुनअनुसार विदेशी पाहुना वा नेताबाट प्राप्त उपहार आफूसँग राख्न चाहिने हो भने बजार मूल्य तिरेर खरिद गर्नुपर्छ र बेच्दा भएको नाफा राज्यलाई जानकारी दिनुपर्छ। तर अभियोजकहरूका अनुसार खान दम्पतीले करिब ४२ लाख ८५ हजार मूल्यका उपहार केवल ४ लाख १० हजारमा खरिद गरेको देखाएर ठूलो नाफा कमाएका थिए।

फैसलापछि इमरान खानका समर्थकहरूले तीव्र विरोध जनाएका छन्। उनका प्रवक्ता जुल्फिकार बुखारीले कुनै गलत नियत, व्यक्तिगत फाइदा वा राज्यलाई नोक्सान भएको प्रमाण बिना नै सजाय दिइएको आरोप लगाए। खानको पार्टी पाकिस्तान तहरीक–ए–इन्साफले यो मुद्दा नक्कली भएको र फैसलालाई देशको इतिहासकै कालो अध्याय भनेको छ।

पार्टीका अनुसार फैसला रावलपिंडीको आदियाला जेलभित्र सुनाइएको थियो। इमरान खान अदालतमा उपस्थित भए पनि उनको परिवारलाई प्रवेश दिइएन। पार्टीले बन्द ढोकाभित्र गरिएको सुनुवाइ न निष्पक्ष न स्वतन्त्र भएको र यो मुद्दा राजनीतिक तथा सैन्य दबाबमा चलेको दाबी गरेको छ।