सर्वसम्मति कि प्रतिस्पर्धा? महासंघ निर्वाचन अघि ढकाल–श्रेष्ठ टकराव, गुटबन्दीको विवाद चर्कियो

काठमाडौँ — नेपाल उद्योग वाणिज्य महासंघको आगामी निर्वाचन नजिकिँदै जाँदा आन्तरिक राजनीति झन् तीव्र बन्दै गएको छ। यसैक्रममा महासंघका अध्यक्ष चन्द्रप्रसाद ढकालको पछिल्लो सार्वजनिक अभिव्यक्तिले निजी क्षेत्रभित्र नयाँ तरंग सिर्जना गरेको छ।

आगामी निर्वाचनमा दुई स्पष्ट समूह प्यानलसहित प्रतिस्पर्धामा उत्रिने तयारी भइरहेका बेला अध्यक्ष ढकालले भावी अध्यक्ष तथा हालका वरिष्ठ उपाध्यक्ष अञ्जन श्रेष्ठलाई गुटबन्दी नगर्न र तटस्थ रहन चेतावनी दिएका छन्। महासंघको विधानअनुसार वरिष्ठ उपाध्यक्ष स्वतः अध्यक्ष हुने व्यवस्था रहे पनि श्रेष्ठले पर्दापछाडि आफ्नै समूह निर्माण गरी चुनावी गतिविधिमा सक्रिय रहेको आरोप ढकालले लगाएका छन्।

ढकालले उक्त व्यवस्था नेतृत्व हस्तान्तरणलाई सहज र विवादरहित बनाउन ल्याइएको स्मरण गराउँदै त्यसको मर्मविपरीत गतिविधि भइरहेको टिप्पणी गरेका छन्। उनले वरिष्ठ उपाध्यक्षले कुनै पक्ष विशेषको समर्थनमा खुलेर लाग्नु महासंघको आन्तरिक लोकतन्त्र र निष्पक्षतामाथि प्रश्न उठाउने बताएका छन्।

यसैबीच, वरिष्ठ उपाध्यक्षका उम्मेदवार हेमराज ढकाल समूहको कार्यक्रममा अध्यक्ष ढकालले यदि गुटबन्दी कायम रहे आफू पनि अर्को पक्षको समर्थनमा खुल्ने चेतावनी दिएका छन्। उनले हालसम्म आफू सर्वसम्मतिको पक्षमा रहेको उल्लेख गर्दै भावी नेतृत्वले तटस्थता कायम नगरे परिस्थिति परिवर्तन हुन सक्ने संकेत गरेका छन्।

अध्यक्ष ढकालले आफ्नो कार्यकालमा महासंघले उठाएका प्रमुख एजेन्डाहरू सफलतापूर्वक कार्यान्वयन भएको दाबी गर्दै नयाँ नेतृत्वका लागि चुनौती थपिएको बताएका छन्। विशेषगरी निजी क्षेत्र संरक्षण तथा प्रवर्द्धनसम्बन्धी नीति पारित गराउनु आफ्नो कार्यकालको प्रमुख उपलब्धि भएको उनको भनाइ छ।

उनले वर्तमान राजनीतिक सन्दर्भमा शक्तिशाली सरकारको उपस्थिति उल्लेख गर्दै यस्तो अवस्थामा निजी क्षेत्र विभाजित हुनु दुर्भाग्यपूर्ण हुने बताएका छन्। महासंघको शक्ति एकतामा निहित रहेको र गुटबन्दीले सरकारसँगको वार्ताशक्ति कमजोर बनाउने उनको तर्क छ।

ढकालको पछिल्लो अभिव्यक्तिले निर्वाचनको अन्तिम चरणमा समीकरण बदल्न सक्ने आँकलन गरिएको छ। अब महासंघमा सर्वसम्मत नेतृत्व चयन हुन्छ वा गुटगत प्रतिस्पर्धा चर्किन्छ भन्ने विषय आगामी निर्वाचन परिणामले स्पष्ट पार्नेछ।