विश्व बैंक–आईएमएफ बैठकमा अर्थमन्त्री खनाल सक्रिय, व्यापार र विकास सहकार्यमा जोड

काठमाडौं। विश्व बैंक र अन्तर्राष्ट्रिय मुद्रा कोष (आईएमएफ) को वार्षिक बैठकका क्रममा अमेरिकाको वासिङ्टन डीसीमा रहेका अर्थमन्त्री रामेश्वर खनालले लगातार उच्चस्तरीय भेटवार्ता र छलफलमा सहभागिता जनाइरहेका छन्।

अर्थ मन्त्रालयका अनुसार सोमबार र मंगलबार मन्त्री खनालले अमेरिकाका उपव्यापार प्रतिनिधि व्रायन स्वीजरसँग भेट गरी नेपाल–अमेरिका बीचको द्विपक्षीय व्यापार विस्तार र कर नीतिबारे गहन छलफल गरेका थिए। मन्त्रालयले उक्त छलफललाई उपयोगी र परिणाममुखी भएको जनाएको छ।

मंगलबार नै मन्त्री खनालले विकासका लागि साउदी फन्डका अध्यक्ष अब्दुल रहमान अल मर्सदसँग भेट गरी आगामी परियोजना र सहकार्यका सम्भावनाबारे विचार–विमर्श गरेका थिए। यसअघि उनले नेपालको विकासमा संलग्न विभिन्न अन्तर्राष्ट्रिय निकायका प्रतिनिधिसँग पनि अलग–अलग बैठक गरेका थिए।

भेटघाटको क्रममा अमेरिकाका लागि नेपालका राजदूत लोकदर्शन रेग्मी, दूतावासका अधिकारी, भ्रमणदलका सदस्य र अन्य कर्मचारीहरूको पनि उपस्थिती रहेको थियो।

त्यस दिन नै मन्त्री खनालले अमेरिकी चेम्बर अफ कमर्सका प्रतिनिधि, जापानी सहयोग नियोग (जाइका) का उपाध्यक्ष, साथै विश्व बैंक र अन्तर्राष्ट्रिय मुद्रा कोषका वरिष्ठ पदाधिकारीहरूसँग समेत छुट्टाछुट्टै छलफल गरेका थिए। यी सबै भेटघाटमा नेपालको विकास साझेदारी, लगानी प्रवर्द्धन, र आर्थिक नीतिगत सहकार्यलाई प्राथमिकता दिइएको अर्थ मन्त्रालयले जनाएको छ।

यस श्रृंखलाबद्ध भेटवार्ताले नेपालका लागि आगामी दिनमा व्यापारिक सहकार्य, विदेशी लगानी आकर्षण र विकास साझेदारीमा नयाँ ढोका खोल्ने अपेक्षा गरिएको छ।