धुलिखेल अस्पतालमा आपत्कालीन सेवा विस्तार, जापान सरकारको ५७ करोड येन सहयोग

काभ्रेपलाञ्चोक — धुलिखेल नगरपालिका–६ स्थित धुलिखेल अस्पतालमा ट्रमा तथा आपत्कालीन सेवा केन्द्र (ट्रमा एण्ड इमर्जेन्सी सेन्टर) निर्माण गरिने भएको छ । जापान सरकारको सहयोगमा उक्त केन्द्र निर्माण गरिने भएको हो ।

नेपाल सरकारको पहलमा धुलिखेल अस्पताल र जापान अन्तर्राष्ट्रिय सहयोग एजेन्सी (जाइका) बीच भएको समझदारीअनुसार जापानले “ट्रमा एण्ड इमर्जेन्सी सेन्टर सुधार परियोजना (आन्तरिक अनुदान)” अन्तर्गत थप ५७ करोड ३० लाख येन बराबरको अनुदान सहायता उपलब्ध गराउने भएको हो ।

अर्थ मन्त्रालयमा यही जेठ २ गते उपप्रधानमन्त्री एवं अर्थमन्त्री विष्णुप्रसाद पौडेल र जापानका संसदीय उपविदेशमन्त्री इकुइना अकिकोबीच उक्त अनुदान सम्झौतामा हस्ताक्षर भएको हो ।

यसअघि नै सन् २०२३ मा परियोजना कार्यान्वयनका लागि जापान सरकारले तीन अर्ब २९६ करोड येनको अनुदान सहायता सम्झौता गरिसकेको थियो । तर, मूल्यवृद्धि र अन्य विविध कारणले थप रकम आवश्यक परेपछि हाल पुनः अनुदान सहयोग प्राप्त भएको नेपालस्थित जापानी दूतावासले जनाएको छ ।

दूतावासका अनुसार नेपालको भौतिक पूर्वाधार विकास, सडक विस्तार, सवारी साधनको वृद्धि, दुर्घटना, स्ट्रोक र मुटु रोगजस्ता नसर्ने रोगका बिरामी बढ्न थालेसँगै अस्पतालहरूमा श्यया तथा उपकरणको चाप बढेकाले यस किसिमको सहयोग आवश्यक भएको हो ।

यस परियोजनामार्फत एक सय श्यया क्षमताको ट्रमा केन्द्र निर्माण हुने जनाइएको छ । केन्द्रमा पार्किङ, आइसीयू, एचडियु, तीनवटा अपरेसन थिएटर, ल्याब, फार्मेसी तथा फोहर व्यवस्थापनसहितका सेवा सुविधा रहनेछन ।

आयोजना अन्तर्गत तीन तला बेसमेन्टसहित पाँच तले भवन निर्माण गरिनेछ, जुन भूकम्प प्रतिरोधात्मक र आपतकालीन सेवाका संरचनासहित रहनेछ । परियोजनाको वातावरणीय प्रभाव मूल्याङ्कन (EIA) प्रतिवेदनमा यसबारे स्पष्ट उल्लेख गरिएको छ ।

निर्माण सम्झौताअनुसार जापान सरकारले भवन निर्माण लागतमा ६० प्रतिशत तथा सबै मेडिकल उपकरण खरिदमा ४० प्रतिशत लगानी गर्नेछ ।

धुलिखेलमा ट्रमा केन्द्रको स्थापना भएसँगै अरनिको राजमार्ग र विपी राजमार्गमा हुने दुर्घटनाका घाइतेलाई काठमाडौँसम्म लैजानुपर्ने बाध्यता अन्त्य हुने अपेक्षा गरिएको छ । अरनिको राजमार्गले धुलिखेललाई चीनको तिब्बतसँग र विपी राजमार्गले पूर्वी नेपाल हुँदै भारतसँग जोडेको छ ।

चिकित्सकीय दृष्टिकोणले दुर्घटनापछि उपचारको पहिलो छ घण्टालाई ‘गोल्डेन आवर’ भनिन्छ । यही अवधिमा उपचार गरियो भने बिरामीको ज्यान जोगिने सम्भावना अत्यधिक हुने भएकाले यस्तो ट्रमा केन्द्रको आवश्यकता झन् बढेको हो ।