काठमाडौँ । नेपाल विद्युत् प्राधिकरणका कार्यकारी निर्देशक कुलमान घिसिङले देशभर विद्युतीय सवारी साधनको प्रवर्द्धन गर्न चार्जिङ स्टेशनहरूको संख्यामा वृद्धि गर्नुपर्ने आवश्यकता औंल्याएका छन्।
स्वतन्त्र ऊर्जा उत्पादकहरूको संस्था, नेपाल (इप्पान) को २५औँ वार्षिकोत्सवका अवसरमा बिहीबार आयोजित इप्पान इभी र्यालीमा बोल्दै उनले नेपालमा पछिल्ला वर्षहरूमा विद्युतीय सवारी साधनको प्रयोग उल्लेख्य रूपमा बढेको बताएका छन्। निजी सवारी साधन मात्र नभई देशभर सञ्चालन हुने यात्रुवाहक सवारी साधन पनि क्रमशः विद्युतीय मोडेलमा रुपान्तरण भइरहेको उनले उल्लेख गरेका छन्।
कार्यकारी निर्देशक घिसिङले विद्युतीय यात्रुवाहक सवारी साधनको बढ्दो प्रयोगलाई ठूलो सकारात्मक परिवर्तनका रूपमा चित्रण गर्दै नेपालभित्रै विद्युत खपत बढाउन प्राधिकरणले अभियान सञ्चालन गरिरहेको स्पष्ट पारे। उनले इप्पानद्वारा आयोजित इभी र्यालीले उक्त अभियानलाई थप बल प्रदान गरेको धारणा व्यक्त गरेका छन्।
उनका अनुसार हाल विद्युतीय सवारी साधनहरूको खरिद-बिक्री करिब ७० प्रतिशतसम्म पुगेको छ। यद्यपि, उनले विद्युतीय सवारी साधन प्रवर्द्धन केवल ती सवारी साधन खरिद गरेर मात्र सम्भव नहुने भन्दै त्यसका लागि आधारभूत संरचना निर्माण अपरिहार्य रहेको बताएका छन्।
उनले निजी क्षेत्रको सहभागितामा हालसम्म ६०० भन्दा बढी चार्जिङ स्टेशन निर्माण भइसकेको जानकारी दिँदै चार्जिङ स्टेशनहरूको संख्या अझै थप गर्नुपर्नेमा जोड दिएका छन्।
इप्पानका अध्यक्ष गणेश कार्कीले पनि नेपालमा उत्पादित विद्युतलाई मुलुकभित्रै खपत गर्ने वातावरण सिर्जना गर्न आवश्यक रहेको धारणा राखेका छन्। उनले विद्युत उत्पादन वृद्धि भइरहेकाले विद्युतीय सवारी साधन प्रयोगलाई प्राथमिकतामा राख्नुपर्नेमा जोड दिएका छन्।
कार्यक्रममा दुवै वक्ताले नेपालमा विद्युतीय सवारी साधनको विकास र विस्तारलाई प्रोत्साहन गर्ने सरकारी नीतिहरूलाई प्रभावकारी रूपमा कार्यान्वयन गर्न आग्रह गरेका छन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
