मुलुकभर वातावरण निरीक्षक विवरण संकलन गर्न प्रदेश–स्थानीय तहलाई पत्राचार

काठमाडौँ– संघीय मामिला तथा सामान्य प्रशासन मन्त्रालयले मुलुकभर वातावरण निरीक्षकको विवरण संकलनका लागि प्रदेश तथा स्थानीय तहलाई पत्राचार गरेको छ। वन तथा वातावरण मन्त्रालय, योजना, अनुगमन तथा समन्वय महाशाखाको प.सं. अनुगमन / २०८२/८३ च.नं. १८७ मितिको पत्र अनुरूप मिति २०८२/८/३ मा बसेको मन्त्रिस्तरीय विकास समस्या समाधान समितिको बैठकले निर्णय गरेको विवरण संकलन प्रक्रिया सुरु भएको हो।

पत्रमा उल्लेख छ, मुलुकभर हाल वातावरण निरीक्षक संघ, प्रदेश र स्थानीय तहमा कति संख्या रहेका छन्, मुलुकका लागि आवश्यक निरीक्षकको संख्या कति छ, र उपलब्ध जनशक्तिले वातावरण सम्बन्धी कार्य समुचित रूपमा सञ्चालन गर्न सकिरहेको अवस्था छ कि छैन भन्ने विषयमा जानकारी माग गरिएको छ।

प्रदेश तथा स्थानीय तहका सम्बन्धित निकायहरूले उक्त विवरण सम्बन्धित ढाँचामा संकलन गरी वातावरण विभागमा उपलब्ध गराउनुपर्नेछ। साथै, विवरणको सफ्टकपी [email protected] मा पनि पठाउने व्यवस्था मिलाउन मन्त्रालयले अनुरोध गरेको छ।

यस कदमले मुलुकको वातावरण संरक्षण तथा व्यवस्थापनमा जनशक्ति अवस्था र आवश्यक सुधारका उपायहरू पहिचान गर्न सहयोग पुग्ने विश्वास गरिएको छ।