दलहरूसँग संवाद नै नगरी निर्वाचन कार्यतालिका सार्वजनिक गरियो: एमाले

काठमाडौं । नेकपा एमालेले सरकार र निर्वाचन आयोगले राजनीतिक दलहरूसँग कुनै संवाद नगरी प्रतिनिधि सभा निर्वाचनको कार्यतालिका सार्वजनिक गरेको भन्दै असन्तुष्टि व्यक्त गरेको छ।

एमाले प्रचार विभाग प्रमुख राजेन्द्र गौतमका अनुसार सरकारले निषेधात्मक व्यवहार देखाउँदै दलहरूलाई छलफलमा नबोलाई कार्यतालिका ल्याउनु हास्यास्पद भएको छ। उनले भने, “सरकार चुनाव गर्ने होइन, नगर्ने तयारीमा देखिन्छ।”

फागुन २१ गते हुने प्रतिनिधि सभा निर्वाचनको कार्यतालिका सोमबार सार्वजनिक गरिएको थियो। त्यसबारे एमालेले गम्भीर आपत्ति जनाउँदै प्रधानमन्त्री सुशीला कार्की नेतृत्वको सरकारलाई तुरुन्त सबै दलसँग संवाद गर्न आग्रह गरेको हो।

गौतमले लोकतन्त्र र संविधानप्रति प्रतिबद्ध सरकारले देशमा शान्ति–सुरक्षा कायम गर्दै सबै दलको सुझावका आधारमा निर्वाचनको वातावरण बनाउनुपर्ने बताए। उनले आवश्यक संवाद नभए दलहरूले आफ्ना धारणा अनुसार अघि बढ्ने चेतावनी पनि दिएका छन्।