नविकरण शुल्क २० हजार: नेपाल शैक्षिक परामर्श संघको शिक्षामन्त्रीसमक्ष पुनर्विचार माग

काठमाडौँ — वैदेशिक शिक्षा क्षेत्रका समग्र समस्या, चुनौती तथा आवश्यक नीतिगत सुधारबारे नेपाल शैक्षिक परामर्श संघले आज शिक्षा, विज्ञान तथा प्रविधि मन्त्री डा. महावीर पुनलाई सिंहदरबारस्थित कार्यकक्षमै भेटेर औपचारिक रूपमा अवगत गराएको छ। भेटका क्रममा संघले पछिल्लो समय विवादास्पद बनेको नविकरण शुल्क वृद्धि विषयलाई मुख्य एजेन्डाका रूपमा प्रस्तुत गरेको थियो।

हाल कायम रहेको वार्षिक ३,००० रुपैयाँ नविकरण शुल्कलाई एकैपटक २०,००० रुपैयाँ पुर्‍याउने सरकारको निर्णय असान्दर्भिक र क्षेत्रअनुकूल नभएको भन्दै नेपाल शैक्षिक परामर्श संघले मन्त्री पुनलाई पुनर्विचार गर्न आग्रह गर्दै औपचारिक ध्यानाकर्षण पत्र हस्तान्तरण गरेको छ। संघका अनुसार, यस्तो आकस्मिक र उच्च दरको शुल्क वृद्धिले शैक्षिक परामर्श सेवा प्रदायक संस्थाहरूमा अनावश्यक आर्थिक बोझ थप्ने, साना तथा मध्यम परामर्श केन्द्रहरू बन्द हुने जोखिम बढाउने र क्षेत्रको व्यवस्थित विकासमा अवरोध सिर्जना गर्ने सम्भावना छ।

नेपाल शैक्षिक परामर्श संघले विद्यार्थी सेवामा यसको प्रत्यक्ष असर पर्ने, सेवा शुल्क वृद्धि हुन सक्ने तथा वैदेशिक अध्ययन प्रक्रियामा थप जटिलता आउने बारे पनि विस्तृत रूपमा मन्त्रीसमक्ष प्रष्ट्याएको छ। संघले नीतिगत निर्णयहरू सरोकारवाला पक्षहरूसँग समन्वय गरी तथ्यकाे आधारमा पुनः समीक्षा गर्न आग्रह गरेको छ।