भियतनाममा खराब मौसमका कारण डुङ्गा पल्टिँदा कम्तीमा ३४ जनाको मृत्यु

एजेन्सी । भियतनाममा खराब मौसमका कारण पर्यटकीय डुङ्गा पल्टिँदा कम्तीमा ३४ जनाको मृत्यु भएको छ भने धेरै जना अझै बेपत्ता छन्। यो घटना देशको उत्तरमा रहेको लोकप्रिय पर्यटकीय गन्तव्य हा लङ खाडीमा भएको हो। धेरैजसो यात्रुहरू राजधानी हनोईबाट भ्रमण गर्न आएका भियतनामी परिवारहरू रहेको बताइएको छ। भारी वर्षाले बाँचेकाहरूको खोजीमा बाधा पुर्‍याएको उद्धारकर्ताहरूले बताएका छन्, तर अहिलेसम्म ११ जनालाई पानीबाट जीवितै निकालिएको छ। उद्धारकर्मीहरूका अनुसार मुसलधारे वर्षाका कारण जीवित व्यक्तिहरूको खोजीमा कठिनाइ भइरहेको छ ।

हालसम्म फेला परेका शवमध्ये कम्तीमा आठ जना बालबालिका छन् । ११ जनालाई भने जीवितै पानीबाट निकालिएको छ । “वान्डर सिज” नामको सो डुंगा ५३ जनालाई लिएर जाँदै गर्दा एक्कासि आएको आँधीबेहरीका कारण पल्टिएको भियतनामी सीमा सुरक्षाबलले जनाएको छ । हराइरहेका मानिसहरुको खोजीका लागि उद्धारकार्य जारी छ । एक प्रत्यक्षदर्शीले एएफपी समाचार एजेन्सीलाई बताएअनुसार शनिबार २ बजेतिर आकाश अँध्यारो भयो। उनले भने, मुसलधारे वर्षा, आँधीबेहरी र बिजुलीसँगै औंला जत्तिकै ठूला असिना परेको थियो ।