डेल्सी बनिन् भेनेजुएलाको कार्यकारी राष्ट्रपति

एजेन्सी । भेनेजुएलामा जारी राजनीतिक अन्योलका बीच उपराष्ट्रपति डेल्सी रोड्रिगेज देशको कार्यकारी राष्ट्रपति नियुक्त भएकी छन्। राष्ट्रपति निकोलस मादुरो पदबाट अलग भएपछि संविधानअनुसार डेल्सीले कार्यकारी राष्ट्रपतिको जिम्मेवारी सम्हालेकी हुन्। अमेरिकाले शनिबार भेनेजुएलामा आक्रमण गरी राष्ट्रपति निकोलस मादुरोलाई नियन्त्रणमा लिएपछि डेल्सीले कावा राष्ट्रपतिको जिम्मेवारी सम्हालेकी हुन् ।साथै भेनेजुएलामा अर्को सरकार नबनेसम्म अमेरिकाले नै सरकार चलाउने राष्ट्रपति डोनाल्ड ट्रम्पले घोषणा गरेका छन् ।

राष्ट्रपति ट्रम्पले सामाजिक सञ्जालमार्फत यो कारबाहीलाई अमेरिका र भेनेजुएलाबीच बढ्दो तनावको परिणाम भनेका छन्। उनले मादुरो सरकारलाई पटक–पटक “नार्को–आतङ्कवादी” भन्दै आरोप लगाउँदै आएका छन्। यसअघि पनि अमेरिकाले भेनेजुएलाको तेल ढुवानीमा संलग्न जहाजहरूमाथि प्रतिबन्ध लगाएको थियो र लागुऔषध तस्करीको आरोप लगाउँदै समुद्री क्षेत्रमा कडाइ बढाएको जनाएको थियो।

सरकारको आधिकारिक घोषणाअनुसार नयाँ सरकार गठन नहुँदासम्म डेल्सीले दैनिक प्रशासनिक काम, सुरक्षा व्यवस्थापन र अन्तर्राष्ट्रिय सम्बन्ध सम्हाल्नेछिन्। डेल्सीले देशलाई स्थिरतामा फर्काउने, जनताको जीवन सहज बनाउने र संवादमार्फत राजनीतिक समाधान खोज्ने प्रतिबद्धता व्यक्त गरेकी छन्।

राजधानी कराकाससहित विभिन्न शहरमा सुरक्षा सतर्कता बढाइएको छ। सरकारी कार्यालय, बैंक तथा अत्यावश्यक सेवाहरू नियमित सञ्चालनमा रहेको बताइएको छ। सरकारले नागरिकलाई अफवाहमा नपर्न र शान्ति कायम राख्न आग्रह गरेको छ। अन्तर्राष्ट्रिय समुदायले घटनाक्रमलाई नजिकबाट हेरिरहेको छ। केही देशले संयम अपनाउन र लोकतान्त्रिक प्रक्रियाबाट समाधान खोज्न आग्रह गरेका छन्। विपक्षी दलले भने स्पष्ट समयसीमा तोकेर नयाँ सरकार गठन गर्न माग गरेका छन्। राजनीतिक अनिश्चितताका बीच आम नागरिकले शान्ति, सुरक्षा र आर्थिक स्थिरताको अपेक्षा गरेका छन्।