एमाले ११औँ महाधिवेशन: नेतृत्व चयनका लागि मतदान सुरु

काठमाडौँ – नेकपा एमालेको ११औँ राष्ट्रिय महाधिवेशनअन्तर्गत नयाँ नेतृत्व चयनका लागि मतदान सुरु भएको छ। अध्यक्ष पदका प्रत्याशी वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलले पहिलो मत खसाल्दै औपचारिक रूपमा मतदान प्रक्रिया प्रारम्भ गरेका हुन्।

बिहान ८ बजेदेखि सुरु हुने तय भएको मतदान प्राविधिक कारणले करिब डेढ घण्टा ढिलो गरी सुरु भएको हो। मतदानस्थलमा देशभरबाट आएका नेता–कार्यकर्ताहरूको उल्लेख्य सहभागिता देखिएको छ भने मतदानका लागि लामो लाइन लागेको छ।

यसअघि मङ्गलवार नै मतदान गर्ने कार्यतालिका भए पनि विद्युतीय प्रणालीसम्बन्धी प्राविधिक समस्याका कारण मतदान आजका लागि सारिएको थियो। मङ्गलवार साँझसम्म मतदाताहरू मतदानको प्रतीक्षामा लाइनमा बसे पनि राति ८ बजेपछि आज मतदान हुने जानकारी दिँदै फर्काइएको थियो।

महाधिवेशनमा सहभागी २ हजार २६३ जना प्रतिनिधिले अध्यक्षदेखि केन्द्रीय सदस्यसम्मका पदहरूमा मतदान गर्नेछन्। अध्यक्ष पदमा ओली र पोखरेलबीच प्रत्यक्ष प्रतिस्पर्धा भइरहेको छ। दुवै पक्षले आ–आफ्नो प्यानलसहित चुनावी मैदानमा उत्रिएपछि मतदानस्थल आसपास समर्थकहरूको नारा, भोट माग्ने गतिविधि र चुनावी चहलपहल तीव्र देखिएको छ।

मतदान सम्पन्न भएपछि तत्काल मतगणना सुरु गरिने र नतिजा छिट्टै सार्वजनिक हुने केन्द्रीय निर्वाचन आयोगले जनाएको छ। ११औँ महाधिवेशनले पार्टीको संगठन सुदृढीकरण, नेतृत्व पुनःसंरचना र भावी राजनीतिक रणनीतिलाई केन्द्रमा राख्दै नयाँ नेतृत्व चयन गर्ने अपेक्षा गरिएको छ।