‘धित्तो निलामीको गुनासो गम्भीर छ, अनुसन्धान हुन्छ’ – राष्ट्र बैंक गभर्नर पौडेल

जनकपुरधाम, – नेपाल राष्ट्र बैंकका गभर्नर डा. विश्वनाथ पौडेलले कुनै पनि बैंक वा वित्तीय संस्थाले ग्राहकलाई ठगेको भेटिए तत्काल कडा कारबाही गरिने चेतावनी दिएका छन्।

सोमबार जनकपुरधाममा नेपाल उद्योग वाणिज्य महासंघ र विभिन्न बैंक तथा वित्तीय संस्थाका पदाधिकारीहरूसँगको छलफलमा बोल्दै गभर्नर पौडेलले भने, “बैंकहरूले ग्राहकलाई समस्यामा पार्ने, अनावश्यक बहानामा ऋणीलाई अप्ठ्यारोमा पार्ने वा ठग्ने कार्य स्वीकार्य छैन। यस्तो कार्य पुष्टि भए तुरुन्त कारबाही हुन्छ।”

छलफलको क्रममा धनुषाका व्यापारीहरूले धित्तो राखेर ऋण लिएका ग्राहकलाई अनावश्यक कानुनी जटिलता सिर्जना गरी धितो निलामी गरिएको गुनासो प्रस्तुत गरेका थिए। साथै, साना व्यापारी तथा किसानहरूलाई बैंकले ऋण प्रक्रिया सहज बनाउनुको सट्टा तिरस्कार गर्ने प्रवृत्ति रहेको भन्दै असन्तुष्टि जनाएका थिए।

गभर्नर पौडेलले ती गुनासोहरूलाई गम्भीरताका साथ लिँदै बैंकहरूलाई सबै ग्राहकसँग सम्मानजनक व्यवहार गर्न र कुनै पनि वर्ग–वर्गीकरण नगरी सेवा प्रदान गर्न निर्देशन दिए। विशेषगरी ग्रामीण क्षेत्रका अशिक्षित, अल्पज्ञानी तथा किसान वर्गका लागि बैंकहरूमा दोभाषे कर्मचारीको व्यवस्था गर्नुपर्ने आवश्यकता औँल्याए।

छलफलमा मिटरब्याज समस्याको सन्दर्भमा गभर्नर पौडेलले सरकारद्वारा चालिएका कदमहरू सकारात्मक रहेको बताए। तर, ग्रामीण क्षेत्रका गरिब वर्गलाई सामाजिक–सांस्कृतिक क्रियाकलाप (विवाह, भोज, धार्मिक कार्य आदि) का लागि पनि सुलभ ऋण पहुँच आवश्यक रहेको भन्दै त्यसका लागि नीतिगत सुधार आवश्यक रहेको धारणा राखे।

बैंक प्रतिनिधिहरूले मधेश प्रदेशमा ऋण लिनेभन्दा पनि ऋण तिर्न नसक्नेको संख्या बढ्दै गएको उल्लेख गर्दै त्यसको वित्तीय जोखिमबारे चिन्ता व्यक्त गरेका थिए।