चितवन ।पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले चितवनमा निर्माणाधीन गौतमबुद्ध अन्तरराष्ट्रिय क्रिकेट रंगशालाको निर्माण कार्य समयमै सम्पन्न गर्न निर्माण कम्पनीलाई सचेत रहन आग्रह गरेका छन्।
आइतबार रंगशालाको अवलोकन भ्रमणपछि अध्यक्ष दाहालले तोकिएको म्यादभित्रै निर्माण कार्य सम्पन्न हुनु पर्नेमा जोड दिए। उनले उक्त रंगशालाले राष्ट्रिय तथा अन्तरराष्ट्रिय स्तरका क्रिकेट खेलाडी उत्पादनमा उल्लेखनीय योगदान पुर्याउने विश्वास व्यक्त गरे।
निरीक्षणको क्रममा भरतपुर महानगरपालिका प्रमुख रेनु दाहाल तथा इञ्जिनियर सन्तोष आचार्यले अध्यक्ष दाहाललाई रंगशालाको हालसम्मको प्रगति बारे जानकारी गराएका थिए। इञ्जिनियर आचार्यका अनुसार हालसम्म निर्माण कार्यको करिब ३० प्रतिशत भौतिक प्रगति भइसकेको छ।
भरतपुर महानगरपालिका–१५ स्थित रंगशाला संघीय तथा प्रदेश सरकारको सहकार्यमा महानगरपालिकाद्वारा निर्माणाधीन छ। रंगशालाको निर्माण कार्य आगामी २०८३ साल पुस २२ गतेसम्म सम्पन्न गर्ने लक्ष्य लिइएको छ। कुल लागत रु ७८ करोड ५० लाख ९१ हजार रहेको रंगशालाले खेलकुद पूर्वाधारको विकासमा महत्वपूर्ण टेवा पुर्याउने अपेक्षा गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
