मकवानपुरको पर्यटन विकासतर्फ नयाँ पाइला : चन्द्रागिरी एभिएसनको उडान सुरु

मकवानपुर — चन्द्रागिरी डाँडाबाट चन्द्रागिरी एभिएशन प्रा.लि.ले शुक्रबारदेखि व्यवसायिक प्याराग्लाइडिङ उडानको शुभारम्भ गरेको छ। पहिलो दिनको उडान सफल भएको जानकारी दिइएको छ।

उत्तरी मकवानपुरको प्रवेशद्वार मानिने चित्लाङ क्षेत्र हुँदै संघीय राजधानीबाट दैनिक हजारौं पर्यटक मकवानपुर प्रवेश गर्ने गरेका छन्। सोही क्षेत्रको पर्यटन विस्तार र आकर्षणमा टेवा पुर्‍याउने उद्देश्यले यो सेवा सञ्चालनमा ल्याइएको बताइएको छ।

प्याराग्लाइडिङ सेवा शुभारम्भ भएसँगै सम्बन्धित पक्षहरूले यसलाई व्यवसायिक, सुरक्षित र सफल बनाउने अपेक्षा राखेका छन्। पर्यटन प्रवर्द्धनमा टेवा पुर्‍याउने सम्भावनालाई मध्यनजर गर्दै संघीय, प्रदेश तथा स्थानीय सरकारलाई आवश्यक नीतिगत र व्यवस्थापकीय सहयोग गर्नुपर्ने आवश्यकता औंल्याइएको छ।

यसअघि सामाजिक सञ्जालमार्फत महेश बर्तौलाले पहिलो उडान सफल भएको उल्लेख गर्दै भविष्यका लागि शुभकामना व्यक्त गरेका थिए।