मङ्सिर २ गतेदेखि १४ वर्षमुनिका बालबालिकाको क्यान्सर उपचार निःशुल्क

काठमाडौँ , ४ मसिर । भक्तपुर क्यान्सर अस्पतालले १४ वर्षमुनिका बालबालिकाको क्यान्सर उपचार निःशुल्क गर्ने सेवा सुरु गरेको छ। यो सेवा मङ्सिर २ गतेदेखि लागू गरिएको हो। अस्पतालका कार्यकारी निर्देशक डा. उज्ज्वल चालिसेका अनुसार, सरकारको मन्त्रीस्तरीय निर्णयअनुसार, क्यान्सरको सम्पूर्ण उपचार निःशुल्क गरिने निर्णय भक्तपुर क्यान्सर अस्पताल, कान्ति बाल अस्पताल काठमाडौँ, र बिपी कोइराला मेमोरियल क्यान्सर अस्पताल भरतपुरमा लागू गरिएको हो।

स्वास्थ्य तथा जनसङ्ख्यामन्त्री प्रदीप पौडेलले कात्तिक ११ गते यस्तो निर्णय गरेका थिए। यसले बालबालिकालाई आर्थिक अभावका कारण उपचार नपाएर ज्यान गुमाउन नपरोस् भन्ने उद्देश्य राख्दछ। अस्पतालका वरिष्ठ प्रशासकीय प्रमुख राजाराम तजले क्यान्सर रोगको चाप बढिरहेको र अहिले भक्तपुर क्यान्सर अस्पतालमा ६० जना बालबालिकाको उपचार भइरहेको जानकारी दिए।

क्यान्सरको उपचारमा आवश्यक पर्ने ३५ प्रकारका औषधि निःशुल्क उपलब्ध गराइनेछ, जसको लागि स्वास्थ्य मन्त्रालयले डब्लुएचओसँग सम्झौता गरेको थियो। नेपालमा हरेक वर्ष १५०० बालबालिकामा क्यान्सर देखिएको छ ।
।