बंगलादेशमा बीएनपीलाई बहुमत, खालिदा जियाका छोरा प्रधानमन्त्री बन्ने

एजेन्सी । बंगलादेशमा हालै सम्पन्न ऐतिहासिक संसदीय चुनावमा बंगलादेश राष्ट्रवादी पार्टी(बीएनपी)ले स्पष्ट बहुमत हासिल गरेको छ। स्थानीय टिभी स्टेशनहरूका अनुसार ३०० सिटको राष्ट्र सभामध्ये बीएनपीले दुई तिहाइभन्दा बढी सिट जितेको देखिएको छ। यस चुनावलाई लामो समयदेखिको राजनीतिक अस्थिरतापछि देशलाई स्थिरतातर्फ लैजाने महत्वपूर्ण अवसरका रूपमा हेरिएको छ। बीएनपीको नेतृत्व प्रधानमन्त्रीका प्रमुख दावेदार तारिक रहमान ले गरिरहेका छन्। उनी पूर्व प्रधानमन्त्री खालिदा जिया र पूर्व राष्ट्रपति जियाउर रहमान का छोरा हुन्।

यो चुनाव सन् २०२४ मा भएको विद्रोहपछि पहिलो पटक सम्पन्न भएको हो। सो विद्रोहपछि लामो समयदेखि प्रधानमन्त्री रहेकी शेख हसिना अपदस्थ भई भारतको नयाँ दिल्लीमा निर्वासनमा बस्न पुगेकी थिइन्। महिनौँसम्म चलेको हिंसात्मक आन्दोलनले जनजीवन र कपडा उद्योगजस्ता मुख्य क्षेत्रहरू प्रभावित भएपछि जनताले स्थिर सरकारको अपेक्षा गरेका थिए।

चुनावमा जमात ए इस्लामी नेतृत्वको गठबन्धनले ६८ सिट मात्र जित्यो। पार्टी प्रमुख शफिकुर रहमान ले हार स्वीकार गरेका छन्। युवा कार्यकर्ताहरूको नेतृत्वमा बनेको राष्ट्रिय नागरिक पार्टीले पनि सीमित सिट मात्र जित्न सफल भयो।

यससँगै भएको जनमत संग्रहमा जनताले भविष्यमा अधिनायकवादी शासन नहोस् भन्ने उद्देश्यले संविधान संशोधनको पक्षमा मत दिएका छन्। ‘जुलाई चार्टर’ नाम दिइएको सुधार प्याकेज सुशासन, लोकतन्त्र र सामाजिक न्याय स्थापना गर्ने लक्ष्यका साथ अघि सारिएको हो।