काठमाडौँ । अमेरिकाका पूर्वराष्ट्रपति डोनाल्ड ट्रम्पद्वारा अघि सारिएको ‘बिग ब्युटिफुल बिल’ अमेरिकी सिनेटबाट पारित भएको छ। सिनेटमा भएको मतदानमा ५०–५० को बराबरी मत आएपछि उपराष्ट्रपति जेडी भान्सले निर्णायक मत दिँदै विधेयक पारित गराएका हुन्।
सीएनएनका अनुसार, अब यो विधेयक तल्लो सदन (हाउस अफ रिप्रेजेन्टेटिभ्स) मा पठाइनेछ, जहाँ यसबारे चर्को विरोध भइरहेको छ। यसअघि तल्लो सदनमा प्रस्तुत गरिएको सो विधेयकको पहिलो संस्करण केवल एक मतको थोरै बहुमतले मात्र पारित भएको थियो।
पूर्वराष्ट्रपति ट्रम्पले रिपब्लिकनले नियन्त्रण गरेको कांग्रेसलाई यो विधेयक अन्तिम रूप दिई आगामी जुलाई ४ भित्र कानूनमा हस्ताक्षर गर्नुपर्ने समयसीमा तोकेका छन्।
यद्यपि, सिनेटबाट पारित संस्करणमा भएका संशोधनप्रति तल्लो सदनका केही रिपब्लिकन सांसदहरू असन्तुष्ट रहेको जनाइएको छ। बहुमत रिपब्लिकन सांसद भए पनि विधेयकको हालको स्वरूप प्रति उनीहरूको समर्थन सुनिश्चित छैन।
यसैबीच, विश्वकै धनी उद्यमी एलन मस्कले सार्वजनिक रूपमा उक्त विधेयकको विरोध जनाएका छन्। उनले विधेयकको समर्थनमा उभिएका सांसदहरूलाई आगामी निर्वाचनमा हराउने चेतावनी दिएका छन्। मस्कको आरोप छ कि यस विधेयकले अमेरिका ‘बैंक करप्ट’ बन्ने खतरा निम्त्याउँछ।
‘बिग ब्युटिफुल बिल’ ले इलेक्ट्रोनिक सवारीसाधन (EV) क्षेत्रमा अमेरिकी सरकारले दिँदै आएको सहयोगमा व्यापक कटौती गर्ने प्रस्ताव राखेको छ। विश्लेषकहरूका अनुसार, यसको प्रत्यक्ष असर मस्कको कम्पनी टेस्ला माथि पर्नेछ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
