दमक भ्युटावर सञ्चालनमा ल्याउने बालेनको प्रतिबद्धता

काठमाडौँ । झापा–५ बाट प्रतिनिधि सभा सदस्यका उम्मेदवार बालेन्द्र शाह (बालेन)ले आफ्नो बाचापत्र सार्वजनिक गरेका छन्। उनले फागुन २१ को निर्वाचनमा दमक भ्यूटावर र सभागृह सञ्चालनमा ल्याउने प्रतिबद्धता जनाएका छन्। बालेनले संघीय संसद्मा कानुन निर्माण, भ्रष्टाचार नियन्त्रण, नागरिकमैत्री सेवा र स्थानीय जनताको आवाज उठाउने प्रतिवद्धता व्यक्त गरेका छन्।

उनको बाचापत्र अनुसार स्थानीय विकास, शिक्षा, स्वास्थ्य, पूर्वाधार, कृषि, रोजगारी र सामाजिक सुरक्षामा काम गरिनेछ। सामुदायिक विद्यालयमा स्मार्ट कक्षा, प्रयोगशाला र पुस्तकालय स्थापना, विद्यालय छाड्ने दर शून्यमा झार्ने, फरक क्षमता भएका बालबालिकाका लागि नीति सुधार गर्ने योजना छन्। साइन्स पार्क व्यवस्थित गर्ने, त्रिभुवन पुस्तकालय डिजिटल अनुसन्धान केन्द्रमा रूपान्तरण गर्ने, आयुर्वेद प्रतिष्ठान स्थापना गर्ने र बहुप्राविधिक विद्यालय सञ्चालनमा ल्याउने प्रतिबद्धता पनि छन्।

कृषि क्षेत्रमा कन्काई–रतुवा सिँचाइ योजना, श्रम बैंक, कृषि भण्डारण केन्द्र र कृषि अनुसन्धान हव सञ्चालन गरिनेछ। दमक अस्पताललाई ३०० शैयासम्म विस्तार गर्ने, तटबन्ध निर्माण गरी कटान र डुबान रोक्ने र दमक गोल्डकपलाई राष्ट्रिय–अन्तर्राष्ट्रिय स्तरमा प्रवर्द्धन गर्ने योजना बालेनले सार्वजनिक गरेका छन्।