इन्डोनेसियाको बालीमा ६५ जना सवार डुङ्गा दुर्घटना ,चार जनाको मृत्यु

काठमाडौं, असार १९ — इन्डोनेसियाको पर्यटकीय टापु बाली नजिकै डुङ्गा दुर्घटनामा परेर कम्तीमा चार जनाको मृत्यु भएको छ भने दर्जनौं बेपत्ता भएका छन्। डुङ्गा पूर्वी जाभाको बान्युवांगी बन्दरगाहबाट निस्किएको केही समयमै समुद्रमा डुबेपछि दुर्घटना भएको हो।

इन्डोनेसियाको खोज तथा उद्धार एजेन्सी (Basarnas) का अनुसार, हालसम्म २९ जनालाई जीवितै उद्धार गरिएको छ भने अझै ३२ जनाको खोजी कार्य जारी छ। उद्धारमा नौवटा जहाज परिचालित गरिएको छ। बिहान समुद्र शान्त भएपछि खोज तथा उद्धारमा सहयोग पुगेको बताइएको छ।

बान्युवांगीका प्रहरी प्रमुख रामा समतामा पुत्रका अनुसार धेरै बाँचेकाहरू घण्टौं समुद्रमा तैरिएपछि बेहोस अवस्थामा भेटिएका थिए। आत्तिएका आफन्तहरू प्रस्थान बन्दरगाहमा भेला भएर रोइरहेका थिए, प्रियजनको अवस्था थाहा पाउने आशामा।

साउदी अरेबिया भ्रमणमा रहेका राष्ट्रपति प्रबोवो सुबियान्तोले आपतकालीन प्रतिक्रिया दिन निर्देशन दिएका छन्। क्याबिनेट सचिव टेडी इन्द्रा विजयाका अनुसार, दुर्घटनाको प्रमुख कारण खराब मौसम हो। इन्डोनेसिया, जहाँ करिब १७,००० टापुहरू छन्, त्यहाँ समुद्री दुर्घटनाहरू सामान्य छन्, प्रायः ओभरलोड र कमजोर सुरक्षा मापदण्डका कारण यस्ता घटनाहरू हुने गरेका छन्।