सांसद डा. चन्द्रकान्त भण्डारी र उनकी आमाको स्वास्थ्य अवस्था बुझ्न सभापति र सभामुख बर्न अस्पतालमा

काठमाडौं, ०४ फागुन । बुधबार राति ग्यास सिलिण्डर विस्फोट हुँदा गम्भीर घाइते भएका नेपाली कांग्रेसका सांसद डा. चन्द्रकान्त भण्डारी र उनकी आमाको स्वास्थ्य अवस्था बुझ्न सभापति शेरबहादुर देउवा कीर्तिपुरस्थित बर्न अस्पताल पुगेका छन् ।

बिहीबार बिहान अस्पताल पुगेका देउवाले आगोले जलेर घाइते भएका सांसद भण्डारी र उनकी आमाको स्वास्थ्य अवस्थाबारे जानकारी लिएका हुन् ।

यसैबीच, प्रतिनिधिसभाका सभामुख देवराज घिमिरे पनि बर्न अस्पताल पुगेका छन् । उनले सांसद भण्डारीको स्वास्थ्य अवस्थाबारे अस्पतालका प्रमुख डा.किरण भण्डारीसँग जानकारी लिँदै उपचारमा कुनै कमी हुन नदिन र संवेदनशील हुन पनि ध्यानाकर्षण गराए ।

त्यस्तै, अर्थमन्त्री विष्णुप्रसाद पौडेल, स्वास्थ्यमन्त्री पदम गिरी लगायत दलका नेताहरू कीर्तिपुर अस्पताल पुगेका हुन्। सांसद भण्डारी र उनकी आमा हरिकला भण्डारी खाना पकाउने ग्याँस सिलिण्डर विस्फोटबाट गएराति घाइते भएका थिए ।

अस्पतालका अनुसार सांसद भण्डारी र उनकी आमाको  अवस्था गम्भीर छ । र उनीहरुलाई भारत लगेर उपचार गर्न अस्पतालले सिफारिस गरे सँगै भारत लग्ने तयारी भइरहेको छ ।