समानुपातिक प्रणालीतर्फ मतगणना जारी,८२ लाखभन्दा बढी मत गणना

काठमाडौं। प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीतर्फको मतगणना तीव्र गतिमा जारी रहेको छ। निर्वाचन आयोगले सार्वजनिक गरेको पछिल्लो विवरणअनुसार हालसम्म ८२ लाख ९९ हजार ६५० मत गणना भइसकेको छ। गणनामा राष्ट्रिय स्वतन्त्र पार्टी सबैभन्दा अगाडि देखिएको छ। उक्त दलले ४० लाख ६ हजार ६९४ मत प्राप्त गर्दै कुल मतको ४८ दशमलव २८ प्रतिशत मत आफ्नो पक्षमा पारेको छ। यससँगै समानुपातिक प्रणालीतर्फ रास्वपा स्पष्ट रूपमा पहिलो स्थानमा रहेको छ।

दोस्रो स्थानमा रहेको नेपाली कांग्रेसले १३ लाख ४८ हजार ७९९ मत प्राप्त गरेको छ, जुन कुल मतको १६ दशमलव २५ प्रतिशत हो। तेस्रो स्थानमा नेकपा एमाले रहेको छ। एमालेले हालसम्म ११ लाख ४२ हजार ३८१ मत पाएको छ, जसले कुल मतको १३ दशमलव ७६ प्रतिशत हिस्सा ओगटेको छ। चौथो स्थानमा रहेको नेपाली कम्युनिस्ट पार्टीले ५ लाख ८७ हजार २३० मत प्राप्त गर्दै ७ दशमलव ०८ प्रतिशत मत हासिल गरेको छ। त्यस्तै श्रम संस्कृति पार्टीले २ लाख ८९ हजार ९६१ मतसहित ३ दशमलव ४९ प्रतिशत मत पाएको छ भने राष्ट्रिय प्रजातन्त्र पार्टीले २ लाख ७४ हजार ९९१ मत प्राप्त गर्दै ३ दशमलव ३१ प्रतिशत मत हासिल गरेको आयोगले जनाएको छ।

निर्वाचन आयोगका अनुसार केही क्षेत्रमा भने अझै समानुपातिकतर्फको मतगणना सुरु हुन बाँकी छ। संखुवासभा, इलाम क्षेत्र नम्बर १, अछाम क्षेत्र नम्बर २, बाजुरा, गोरखा क्षेत्र नम्बर १ र २ तथा धनुषा क्षेत्र नम्बर १ र २ गरी आठ क्षेत्रमा मतगणना सुरु हुन बाँकी रहेको आयोगका प्रवक्ता नारायणप्रसाद भट्टराईले जानकारी दिएका छन्। यसअघि देशका अधिकांश क्षेत्रमा समानुपातिकतर्फको मतगणना सम्पन्न भइसकेको आयोगले जनाएको छ।

आयोगका अनुसार बाँकी मतगणना फागुन २७ गते बिहानसम्म सम्पन्न गर्ने लक्ष्य राखिएको छ। समानुपातिक मतगणना पूरा भएपछि थ्रेसहोल्ड पार गरेका राजनीतिक दलहरूले प्राप्त गरेको मतका आधारमा प्रतिनिधिसभामा प्राप्त गर्ने सिट संख्या निर्धारण गरिनेछ। त्यसपछि आयोगले दलहरूलाई समानुपातिक सूचीभित्रबाट सांसदको नाम सिफारिस गर्न पत्राचार गर्नेछ। दलहरूले पठाएको नामावली समावेशी क्लस्टरअनुसार मिलेको वा नमिलेको परीक्षण गरी अन्तिम रूपमा निर्वाचित सांसदको नामावली यकिन गरिनेछ। आयोगले सम्पूर्ण प्रक्रिया आगामी चैत ५ गतेभित्र सम्पन्न गर्ने लक्ष्यसहित काम गरिरहेको जनाएको छ।