समस्याग्रस्त १९ सहकारीका ऋणीमाथि असुली प्रक्रिया सुरु हुँदै

काठमाडौं । सरकारले समस्याग्रस्त घोषित १९ सहकारी संस्थाका ऋणी, सञ्चालक र कर्मचारीहरूमाथि कर्जा असुली प्रक्रिया अघि बढाएको छ । समस्याग्रस्त सहकारी व्यवस्थापन समितिको कार्यालयले सार्वजनिक सूचना जारी गर्दै असार मसान्तसम्मको अन्तिम समय तोकिएको जनाएको छ ।

भूमि व्यवस्था, सहकारी तथा गरिबी निवारण मन्त्रालय अन्तर्गतको समितिले सहकारी ऐन, २०७४ को दफा १० अनुसार यी सहकारी संस्थालाई समस्याग्रस्त घोषणा गर्दै सम्पत्ति व्यवस्थापन र दायित्व भुक्तानी प्रक्रिया थालिएको स्पष्ट पारेको छ । समितिका अनुसार पटक–पटक सूचना प्रकाशन गरिए पनि अधिकांशले अहिलेसम्म आफ्नो दायित्व चुक्ता गरेका छैनन् ।

समितिले अन्तिम चेतावनीस्वरूप हालै फेरि सूचना प्रकाशन गर्दै तोकिएको म्यादभित्र दायित्व नचुकाए साउन १ गतेदेखि कडा असुली प्रक्रिया सुरु गर्ने जनाएको छ । त्यसबेलासम्म साँवा, ब्याज र हर्जाना समेत कर्जा रकममा गणना गरी असुली गरिनेछ ।

सरकारले हालसम्म १९ वटा बचत तथा ऋण सहकारी संस्थालाई समस्याग्रस्त घोषणा गरिसकेको छ । ती संस्थामा अर्बौं रुपैयाँको बचत रकम अपचलन भएको पाइएको छ । बचतकर्ताको रकम सुरक्षित गर्न समितिले कडा कदम चाल्दै असुली प्रक्रिया अघि बढाएको हो ।

समस्याग्रस्त घोषणा भएका सहकारी संस्थाहरूको सूचीः
१. प्यासिफिक सेभिङ्ग एण्ड इन्भेष्टमेन्ट को–अपरेटिभ लिमिटेड
२. प्रभु बचत तथा ऋण सहकारी संस्था लिमिटेड
३. ओरेन्टल को–अपरेटिभ लिमिटेड
४. गोरखा सेभिङ्ग एण्ड क्रेडिट सहकारी संस्था लिमिटेड
५. स्टाण्डर्ड सेभिङ्ग एण्ड क्रेडिट को–अपरेटिभ लिमिटेड
६. पशुपति सेभिङ्ग एण्ड क्रेडिट को–अपरेटिभ लिमिटेड
७. शिवशिखर बहुउद्देश्यीय सहकारी संस्था लिमिटेड
८. नेपाल सहकारी वित्तीय संस्था लिमिटेड
९. लुनिभा बहुउद्देश्यीय सहकारी संस्था लिमिटेड
१०. हाम्रो नयाँ कृषि सहकारी संस्था लिमिटेड
११. कृषि विकास बहुउद्देश्यीय सहकारी संस्था लिमिटेड
१२. सोसाइटल बहुउद्देश्यीय सहकारी संस्था लिमिटेड
१३. भेगास बचत तथा ऋण सहकारी संस्था लिमिटेड
१४. तुलसी बहुमुखी सहकारी संस्था लिमिटेड
१५. श्री लालिगुरास बहुउद्देश्यीय सहकारी संस्था लिमिटेड
१६. कञ्जुमर बचत तथा ऋण सहकारी संस्था लिमिटेड
१७. कोहिनुर हिल सेभिङ एण्ड क्रेडिट को–अपरेटिभ लिमिटेड
१८. कान्तिपुर सेभिङ्ग एण्ड क्रेडिट सहकारी संस्था लिमिटेड
१९. गौतम श्री बहुउद्देश्यीय सहकारी संस्था लिमिटेड