युद्धविराम सर्त उल्लंघन गरेको इरानको आरोप , अमेरिकामाथि प्रश्न

काठमाडौं । इरानले अमेरिकासँग भएको हालको युद्धविराम सम्झौता सही रूपमा पालना नभएको आरोप लगाएको छ। इरानका संसद् सभामुख मोहम्मद बागेर गालिबाफले अमेरिका पक्षले सम्झौताका केही महत्वपूर्ण सर्त तोडेको बताएका छन्।

उनका अनुसार इरानले अघि सारेको दशबुँदे प्रस्तावका कम्तीमा तीन सर्त उल्लंघन गरिएको छ। विशेषगरी लेबनानमा इजरायलले आक्रमण जारी राख्नु पनि सम्झौताको विरुद्ध भएको इरानको भनाइ छ।

इरानले अमेरिका माथि पहिले पनि वाचा तोड्ने बानी रहेको आरोप लगाउँदै अहिले पनि त्यही व्यवहार दोहोरिएको जनाएको छ। उनीहरूले भनेका छन् कि अमेरिकी राष्ट्रपति ट्रम्पले यही प्रस्तावलाई वार्ताको आधार मान्ने बताएका थिए, तर व्यवहारमा त्यसलाई पालना नगरेको देखिएको छ।

इरानले पाकिस्तानका प्रधानमन्त्रीले युद्धविराम सबै क्षेत्रमा लागू हुनुपर्ने बताएका भए पनि त्यो लागू नभएको उल्लेख गरेको छ। इरानका अनुसार जब वार्ताको आधार नै तोडिन्छ, त्यस्तो अवस्थामा युद्धविराम वा नयाँ वार्ताको खासै अर्थ नरहने बताइएको छ।