निर्वाचन आयोगद्धारा आगामी वैशाखमा हुने उपनिर्वाचनको कार्यतालिका स्वीकृत

काठमाडौँ, १८ फागुन । निर्वाचन आयोगले आगामी वैशाख १५ गते हुने उपनिर्वाचनको कार्यक्रम स्वीकृत गरेको छ । आयोगका प्रवक्ता शालिग्राम शर्मा पौडेलले आज एक विज्ञप्ति जारी गर्दै यो जानकारी दिएका हुन ।

उनका अनुसार आगामी चैत २४ गते विहान १० देखि साँझ ५ बजेसम्म मुख्य निर्वाचन अधिकृतको कार्यालयमा उम्मेदवारको मनोनयन दर्ता गरिने र सोही दिन बेलुका ५ देखि ६ बजेसम्म उम्मेदवारको सूची प्रकाशन हुनेछ ।

उम्मेदवारको विरोधमा उजुरी दिन परेमा चैत २५ गते विहान १० देखि दिउँसो ३ बजेसम्म उजुरी दिन सकिने र चैत २६ गते बेलुका ५ बजेसम्म मनोनयनपत्र र उजुरीउपर जाँचबुझ एवम् निर्णय गरी ६ बजेसम्म मुख्य निर्वाचन अधिकृतको कार्यालयमा उम्मेदवारको नामावली प्रकाशन गरिने विज्ञप्तिमा  उल्लेख छ ।

आयोगका अनुसार चैत २७ गते विहान ९ देखि दिउँसो १ बजेसम्म उम्मेदवारको नाम फिर्ता लिन सकिनेछ ।