दोस्रो क्‍वालिफायरमा आज विराटनगर र लुम्बिनी भिड्दै

काठमाडौँ । एनपीएलको दोस्रो क्वालिफायर खेल आज अपराह्न ४ बजे लुम्बिनी लायन्स र विराटनगर किङ्सबीच हुँदैछ। तीन टोलीमध्ये सुदूरपश्चिम रोयल्स पहिले नै फाइनलमा पुगेको छ। अब फाइनलमा पुग्ने अर्को टोली आजको खेलबाट निश्चित हुनेछ।

पहिलो क्वालिफायरमा सुदूरपश्चिमसँग ७७ रनले हार खाएपछि विराटनगरलाई दोस्रो मौका मिलेको हो। लुम्बिनीले चाहिँ इलिमिनेटर खेलमा काठमाडौँ गोर्खाजलाई ४ विकेटले हराएर यहाँसम्म यात्रा अगाडि बढाएको हो। लिग चरणमै लुम्बिनीले विराटनगरलाई ५ विकेटले जितेको स्मरणीय खेल पनि भएको थियो।

आज जो पनि जित्छ, त्यो टोली फाइनलमा पुग्नेछ र उपाधिका लागि सुदूरपश्चिम रोयल्ससँग भिड्नेछ। फाइनल मङ्सिर २७ गते हुनेछ।