जापान भूकम्प:मृत्यु हुनेको सङ्ख्या ९२ पुग्यो ,झण्डै २५० बेपत्ता

एजेन्सी |  जापानमा भूकम्पमा परी मृत्यु हुनेको सङ्ख्या  ९२ पुगेको छ । सोमवार इशिकावा प्रान्तको नोटो प्रायद्वीपमा ७.६ म्याग्निच्युडसम्मका शक्तिशाली भूकम्प गएको   थियो ।  भूकम्पपछि बेपत्ता भएका  २५०  जनाको खोजीमा उद्धारकर्ताहरू लागिरहेका छन् ।जापानको सेल्फ डिफेन्स फोर्सले उद्धार र राहतमा भाग लिने सेनाको संख्या दोब्बर बनाएर ४,६०० पुगेको क्योडो समाचार एजेन्सीले जनाएको छ।

धेरै मानिसहरु भत्किएका घरहरु मुनि फसेको अनुमान गरिएको छ । भत्किएका घरहरु मुनि फस्नेमा धेरै जसो सुजु र वाजिमा सहरका रहेका छन् । हजारौं बासिन्दाहरू अझै पनि बिजुली र पानीविहीन रहेका छन् । सयौं बासिन्दा पहिरो र अवरुद्ध सडकहरूको कारण मद्दतबाट टाढा समेत रहेका छन् ।

सोमवार इशिकावा प्रान्तको नोटो प्रायद्वीपमा ७.६ म्याग्निच्युडसम्मका शक्तिशाली भूकम्पहरू गएका थिए । भूकम्प पीडितको उद्धार तथा राहत वितरण अहिले पनि जारी रहेको  छ ।