जनकपुरबाट अमरेशकुमार सिंहको नयाँ राजनीतिक यात्रा सुरु

काठमाडौँ । सर्लाही–४ बाट निर्वाचित स्वतन्त्र सांसद अमरेशकुमार सिंह राष्ट्रिय स्वतन्त्र पार्टीमा प्रवेश गर्ने भएका छन्। उनले यही माघ ५ गते जनकपुरधाममा आयोजना हुने रास्वपाको कार्यक्रममा औपचारिक रूपमा पार्टी प्रवेश गर्न लागिएको जानकारी सामाजिक सञ्जालमार्फत दिएका हुन्।

यसअघि नेपाली कांग्रेसमा आबद्ध रहेका सिंहले पार्टीबाट टिकट नपाएपछि स्वतन्त्र उम्मेदवारी दिएर प्रतिनिधिसभा सदस्यमा विजयी भएका थिए। पछिल्लो समय उनी काठमाडौँ महानगरपालिकाका मेयर बालेन्द्र शाहसँग नियमित राजनीतिक परामर्शमा रहेको चर्चा पनि हुँदै आएको थियो।

सामाजिक सञ्जालमा आफ्नो धारणा सार्वजनिक गर्दै सिंहले माघ ५ गते जगत जननी माता सीताको जन्मस्थल जनकपुरधामबाट नयाँ राजनीतिक अध्याय सुरु गर्न लागेको उल्लेख गरेका छन्। देश र मधेसमा व्याप्त भ्रष्टाचार तथा कुशासनविरुद्ध स्वतन्त्र रहँदा उठाएको आवाज अब पार्टीमार्फत अझ सशक्त रूपमा अघि बढाउने उनको भनाइ छ।

साथै उनले मधेसको शिक्षा, स्वास्थ्य, रोजगारी र भौतिक पूर्वाधार विकासमा चासो राख्ने सम्पूर्ण नागरिकलाई उक्त कार्यक्रममार्फत एकजुट हुन आह्वान गरेका छन्।

राष्ट्रिय स्वतन्त्र पार्टीले माघ ५ गते जनकपुरधाममा बृहत्त राजनीतिक सभा आयोजना गर्ने जनाएको छ। उक्त सभामा पार्टी सभापति रवि लामिछानेलगायत शीर्ष नेताहरू सहभागी हुनेछन्। साथै, काठमाडौँ महानगरपालिकाको मेयर पदबाट राजीनामा दिएका बालेन्द्र शाह पनि पहिलो पटक औपचारिक राजनीतिक कार्यक्रममा सहभागी हुने बताइएको छ।