एसएमएस सेवाको दुरुपयोग नगर्न सेवा प्रदायकलाई नेपाल टेलिकमको चेतावनी

काठमाडौँ। नेपाल टेलिकमको एसएमएस सेवा प्रणालीमा आवद्ध भई एसएमएसमा आधारित सेवा प्रवाह गरिरहेका केही सेवा प्रदायकले आफ्नो स्वीकृत व्यापारिक उद्देश्यभन्दा फरक राजनीतिक प्रकृतिका सन्देश नेपाल टेलिकमका विभिन्न मोबाइल नम्बरमा पठाइरहेको पाइएको छ। यस सम्बन्धमा सेवाग्राहीबाट गुनासो प्राप्त भएपछि नेपाल टेलिकमले ध्यानाकर्षण भएको जनाएको छ।

नेपाल टेलिकमले विभिन्न व्यापार, व्यवसाय तथा सूचना प्रवद्र्धनका उद्देश्यले एसएमएस सेवा प्रवाह गर्न सेवा प्रदायकलाई स्वीकृति दिने व्यवस्था गर्दै आएको छ। तर ती सेवाहरू स्वीकृत उद्देश्यभित्र सीमित रहनुपर्ने र अन्य कुनै उद्देश्यका लागि प्रयोग गर्न नपाइने स्पष्ट प्रावधान रहेको टेलिकमले जनाएको छ।

नेपाल टेलिकमले कुनै पनि सेवाग्राहीको व्यक्तिगत मोबाइल नम्बर वा अन्य व्यक्तिगत विवरण सेवा प्रदायकलाई उपलब्ध नगराउने स्पष्ट गर्दै आएको छ। सेवाग्राहीको विवरण सुरक्षित राख्नु संस्थाको प्राथमिक दायित्व भएको टेलिकमको भनाइ छ।

यसै सन्दर्भमा, सम्बन्धित सेवा प्रदायकलाई जातीय, वर्गीय, धार्मिक, साम्प्रदायिक वा राजनीतिक सद्भावमा खलल पुर्‍याउने खालका सन्देश प्रवाह नगर्न कडा रूपमा सचेत गराइएको छ। साथै, आगामी दिनमा यस्ता प्रकृतिका सन्देश सर्वसाधारणको मोबाइल नम्बरमा नपठाउन सबै सेवा प्रदायकलाई अनुरोध गरिएको छ।

नेपाल टेलिकमले आफ्ना सेवाग्राहीको गोपनीयताप्रति सदैव संवेदनशील रहेको र भविष्यमा पनि गोपनीयताको पूर्ण सम्मान गर्ने प्रतिबद्धता दोहोर्‍याएको छ। सेवाग्राहीको विश्वासलाई उच्च प्राथमिकतामा राख्दै सेवा प्रवाहलाई जिम्मेवार र मर्यादित बनाइने टेलिकमले जनाएको छ।