एमाले महाधिवेशनमा महेश बस्नेत सचिव पदका उम्मेदवार

काठमाडौं। नेकपा एमालेका नेता महेश बस्नेतले पार्टीको ११औँ महाधिवेशनमा सचिव पदका लागि उम्मेदवारी दिने घोषणा गरेका छन्। सोमबार सामाजिक सञ्जालमा भिडियो सन्देश सार्वजनिक गर्दै उनले आफ्नो राजनीतिक यात्रा र भूमिकाको मूल्यांकन गरेर मत दिन कार्यकर्तासँग आग्रह गरेका हुन्।

भिडियोमा बस्नेतले देशमा जातीय र धार्मिक द्वन्द्व फैलाउन खोज्ने शक्तिहरूको एमालेले निरन्तर प्रतिवाद गर्दै आएको दाबी गरेका छन्। पहाड–मधेशबीच द्वन्द्व सिर्जना गर्ने प्रयास, पहिचानका नाममा प्रदेश टुक्र्याउने योजना र धार्मिक सद्भाव बिथोल्ने गतिविधिविरुद्ध आफूले सक्रिय भूमिका खेलेको उनले बताए।

माओवादी द्वन्द्वकालमा समाज र एमाले कार्यकर्ताको सुरक्षाका लागि ‘युथ फोर्स’ नेतृत्व गरेको स्मरण गर्दै बस्नेतले कठिन परिस्थितिमा पनि समाजको मनोबल उच्च राख्न योगदान दिएको उल्लेख गरे। युवासंघको नेतृत्वदेखि सांसद र मन्त्रीसम्मको जिम्मेवारीमा नीति निर्माण र पार्टी संगठन मजबुत बनाउन काम गरेको दाबी गर्दै उनले सचिव पदका लागि समर्थन मागेका छन्।