पाकिस्तानको बलुचिस्तानमा रेलमार्ग विस्फोट, २४ जनाको मृत्यु

काठमाडौँ । पाकिस्तानको बलुचिस्तान प्रान्तमा रेलमार्गमा भएको शक्तिशाली विस्फोटमा कम्तीमा २० जनाको मृत्यु भएको छ भने दर्जनौँ यात्रु घाइते भएका छन् । घटना आज बिहान व्यस्त रेलमार्गमा भएको अन्तर्राष्ट्रिय सञ्चारमाध्यमहरूले जनाएका छन् ।

विस्फोटपछि रेलको अगाडिको भाग पटरीबाट बाहिरिएको थियो र रेलमा आगलागी समेत भएको बताइएको छ । घटनापछि सुरक्षाकर्मी, उद्धार टोली र एम्बुलेन्स तत्काल घटनास्थल पुगेर उद्धार कार्य सुरु गरेका थिए । घाइतेहरूलाई नजिकका अस्पतालमा उपचारका लागि भर्ना गरिएको छ । केहीको अवस्था गम्भीर भएकाले मृतक संख्या अझै बढ्न सक्ने अनुमान गरिएको छ ।

पाकिस्तानी अधिकारीहरूले घटनालाई आतंकवादी हमला भएको आशंका गरेका छन् । प्रारम्भिक अनुसन्धानमा रेलमार्गमा पहिले नै विस्फोटक पदार्थ राखिएको देखिएको बताइएको छ । घटनापछि सो क्षेत्रमा सुरक्षा व्यवस्था कडा पारिएको छ र रेल सेवा अस्थायी रूपमा स्थगित गरिएको छ ।

हालसम्म कुनै पनि समूहले घटनाको जिम्मेवारी लिएको छैन । पाकिस्तानका प्रधानमन्त्रीले घटनाप्रति दुःख व्यक्त गर्दै दोषीलाई कडा कारबाही गरिने बताएका छन् । सुरक्षा निकायले घटनाबारे विस्तृत अनुसन्धान सुरु गरेको जनाएको छ ।