खडेरीको जोखिम बढ्दै,किसानलाई सुख्खा सहन सक्ने धान लगाउन आग्रह

काठमाडौँ । मधेश प्रदेशको भूमि व्यवस्था, कृषि तथा सहकारी मन्त्रालयले यस वर्ष कम वर्षा हुने सम्भावना रहेकाले किसानलाई सुख्खा सहन सक्ने धानका जात लगाउन आग्रह गरेको छ।

जलवायु परिवर्तनका कारण वर्षा अनियमित हुन थालेको र खडेरीको जोखिम बढेको भन्दै मन्त्रालयले ‘सुख्खा–१’ देखि ‘सुख्खा–६’ सम्मका धानका जात रोज्न सुझाव दिएको हो। यी जातका धानले कम पानीमा पनि राम्रो उत्पादन दिने भएकाले किसानलाई फाइदा पुग्ने विश्वास गरिएको छ।

कृषि विज्ञहरूका अनुसार यस वर्ष लामो समयसम्म खडेरी पर्न सक्ने अनुमान छ। त्यसैले किसानलाई वर्षाको पानी संकलन गर्ने, खेत नजिक पोखरी बनाउने तथा उपलब्ध पानीको उचित प्रयोग गर्ने सुझाव दिइएको छ।

सुख्खा सहन सक्ने धानका जात नेपाल कृषि अनुसन्धान परिषद् र अन्तर्राष्ट्रिय धान अनुसन्धान संस्थाको सहकार्यमा विकास गरिएको हो। यी जातले प्रतिहेक्टर ३.५ देखि ४.५ टनसम्म उत्पादन दिन सक्छन्।

गत वर्ष खडेरीका कारण धेरै क्षेत्रमा धान रोपाइँ प्रभावित भएको थियो। त्यसैले बदलिँदो मौसमअनुसार उपयुक्त बीउ र प्रविधि प्रयोग गर्न किसानलाई आग्रह गरिएको छ।